ᠮᠤᠩᠭᠤᠯᠴᠤᠳ ᠤᠨ ᠠᠷᠭᠠᠯ ᠤᠨ ᠰᠤᠶᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2025/1/21
    ᠮᠤᠩᠭᠤᠯᠴᠤᠳ ᠤᠨ ᠨᠢᠲᠤᠨ ᠲᠤ᠂ ᠲᠡᠷᠡᠴᠢᠯᠡᠨ ᠰᠡᠳᠬᠢᠯ ᠳᠤ ᠠᠷᠭᠠᠯ ᠭᠡᠵᠦ ᠵᠦᠪᠬᠡᠨ ᠦᠬᠡᠷ ᠮᠠᠯ ᠤᠨ ᠢᠯᠭᠠᠲᠠᠰᠤ ᠲᠡᠲᠦᠢ ᠪᠢᠰᠢ᠂ ᠮᠦᠨ ᠴᠤ ᠡᠩ ᠤᠨ ᠠᠭᠤᠯᠭ᠎ᠠ ᠲᠡᠭᠡᠷᠡᠬᠢ ᠰᠢᠲᠠᠭᠠᠯᠭ᠎ᠠ ᠲᠦᠯᠡᠰᠢ ᠴᠤ ᠪᠢᠰᠢ᠂ ᠬᠠᠷᠢᠨ ᠮᠤᠲᠤ ᠲᠦᠯᠡᠭᠡ᠂ ᠨᠡᠬᠦᠷᠡᠰᠦ ᠬᠢᠭᠡᠳ ᠰᠢᠲᠠᠮᠠᠬᠠᠢ ᠬᠡᠢ ᠮᠡᠲᠦ ᠶᠢᠨ ᠤᠳᠤ ᠦᠶ᠎ᠡ ᠶᠢᠨ ᠶᠠᠮᠠᠷ ᠴᠤ ᠰᠢᠲᠠᠭᠠᠯᠭ᠎ᠠ ᠪᠠᠷ ᠤᠷᠤᠯᠠᠭᠤᠯᠵᠤ ᠲᠡᠶᠢᠯᠦᠰᠢ ᠦᠭᠡᠢ ᠰᠤᠶᠤᠯ ᠰᠡᠳᠬᠢᠬᠦᠢ ᠶᠢᠨ ᠠᠴᠢᠶᠠᠯᠠᠪᠤᠷᠢ ᠪᠤᠯᠤᠬᠰᠠᠨ ᠪᠠᠶᠢᠳᠠᠭ᠃    ᠮᠠᠯᠴᠢᠨ ᠮᠤᠩᠭᠤᠯᠴᠤᠳ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠢᠶᠠᠨ ᠪᠠᠭᠠᠰᠦ ᠶᠢ ᠠᠳᠠᠯᠢ ᠪᠤᠰᠤ ᠪᠠᠷ ᠨᠡᠷᠡᠯᠡᠲᠡᠭ᠃ ᠬᠤᠨᠢ᠂ ᠢᠮᠠᠭ᠎ᠠ᠂ ᠲᠡᠮᠡᠭᠡᠨ ᠤ ᠬᠢ ᠶᠢ ᠬᠤᠷᠭᠤᠯ ᠭᠡᠵᠦ᠂ ᠠᠳᠤᠭᠤᠨ ᠤ ᠬᠢ ᠶᠢ ᠬᠤᠮᠤᠯ ᠭᠡᠵᠦ᠂ ᠦᠬᠡᠷ ᠤᠨ ᠪᠠᠭᠠᠰᠤ ᠶᠢ ᠠᠷᠭᠠᠯ ᠭᠡᠲᠡᠭ᠃ ᠭᠡᠬᠦ ᠳᠡᠭᠡᠨ ᠦᠬᠡᠷ ᠤᠨ ᠪᠠᠭᠠᠰᠤ ᠶᠢ ᠠᠳᠠᠯᠢ ᠪᠢᠰᠢ ᠤᠯᠠᠷᠢᠯ ᠳᠤ ᠮᠦᠨ ᠪᠠᠰᠠ ᠠᠳᠠᠯᠢ ᠪᠤᠰᠤ ᠨᠡᠷᠡᠯᠡᠲᠡᠭ᠃ ᠡᠪᠦᠯ ᠤᠨ ᠬᠢ ᠶᠢ ᠬᠦᠯᠲᠡᠬᠦᠰᠦ ᠭᠡᠵᠦ᠂ ᠬᠠᠲᠠᠭᠠᠬᠰᠠᠨ ᠢ ᠨᠢ ᠠᠷᠭᠠᠯ ᠭᠡᠨ᠎ᠡ᠃ ᠬᠠᠪᠤᠷ ᠵᠤᠨ ᠤ ᠬᠢ ᠶᠢ ᠰᠢᠷ᠎ᠠ ᠠᠷᠭᠠᠯ᠂ ᠨᠠᠮᠤᠷ ᠤᠨ ᠬᠢ ᠶᠢ ᠬᠠᠷ᠎ᠠ ᠠᠷᠭᠠᠯ᠂ ᠲᠦᠷᠦᠬᠦᠦ ᠵᠢᠯ ᠤᠨ ᠨᠠᠮᠤᠷ ᠤᠨ ᠬᠢ ᠶᠢ ᠬᠦᠬᠡ ᠠᠷᠭᠠᠯ ᠪᠤᠶᠤ ᠬᠠᠪᠤᠷ ᠤᠨ ᠠᠷᠭᠠᠯ᠂ ᠨᠠᠮᠤᠷ ᠤᠨ ᠠᠷᠭᠠᠯ᠂ ᠡᠪᠦᠯ ᠤᠨ ᠠᠷᠭᠠᠯ ᠭᠡᠵᠦ ᠬᠤᠪᠢᠶᠠᠨ ᠨᠡᠷᠡᠯᠡᠲᠡᠭ᠃ ᠡᠪᠦᠯ ᠤᠨ ᠤᠯᠠᠷᠢᠯ ᠳᠤ ᠦᠬᠡᠷ ᠤᠨ ᠪᠠᠭᠠᠰᠤ ᠶᠢ ᠤᠪᠤᠭᠠᠯᠠᠵᠤ᠂ ᠬᠠᠪᠤᠷ ᠬᠠᠭᠠᠰ ᠡᠪᠡᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠲᠠᠯᠠᠩᠯᠠᠨ ᠬᠤᠷᠢᠶᠠᠵᠤ ᠡᠪᠦᠯ ᠤᠨ ᠲᠦᠯᠡᠰᠢ ᠪᠠᠨ ᠪᠡᠯᠡᠳᠭᠡᠲᠡᠭ᠃ ᠬᠠᠪᠤᠷ᠂ ᠵᠤᠨ᠂ ᠨᠠᠮᠤᠷ ᠤᠨ ᠬᠢ ᠶᠢ ᠭᠤᠤᠯᠳᠠᠭᠤ ᠲᠡᠬᠦᠵᠦ ᠴᠤᠭᠯᠠᠭᠤᠯᠲᠠᠭ᠃ ᠡᠪᠦᠯ ᠤᠨ ᠠᠷᠭᠠᠯ ᠰᠡᠪᠰᠡᠭᠡᠷ ᠵᠦᠭᠡᠯᠡᠨ ᠲᠣᠯᠠ ᠦᠮᠦᠭ ᠠᠷᠭᠠᠯ ᠭᠡᠬᠦ ᠪᠠ ᠡᠶᠢᠮᠦ ᠠᠷᠭᠠᠯ ᠢᠶᠠᠷ ᠦᠷᠦᠮ᠎ᠡ ᠬᠦᠭᠡᠷᠦᠬᠦᠯᠪᠡᠯ ᠬᠡᠨᠭᠰᠢᠵᠦ ᠰᠢᠲᠠᠭᠲᠠᠬᠤ ᠦᠭᠡᠢ᠂ ᠰᠢᠩᠭᠡ ᠰᠠᠶᠢᠨ ᠰᠠᠭᠤᠲᠠᠬ᠃ ᠨᠠᠮᠤᠷ ᠤᠨ ᠠᠷᠭᠠᠯ ᠬᠠᠲᠠᠭᠤ ᠪᠤᠯᠬᠤᠷ ᠢᠯᠴᠢ ᠶᠡᠭᠡ᠂ ᠲᠠᠭᠠᠭᠠᠴᠠ ᠰᠠᠶᠢᠲᠠᠢ ᠪᠠᠶᠢᠲᠠᠬ᠃ ᠠᠷᠭᠠᠯ ᠢ ᠬᠦᠷᠲᠡᠯ᠎ᠡ ᠢᠡᠭᠬᠢᠵᠦ ᠰᠢᠨᠵᠢᠵᠤ ᠰᠤᠳᠤᠯᠵᠤ᠂ ᠡᠳ᠋ᠯᠡᠵᠦ ᠬᠡᠷᠡᠭᠯᠡᠲᠡᠭ ᠵᠠᠩ ᠦᠢᠯᠡ ᠪᠦᠬᠦᠢ ᠦᠨᠲᠦᠰᠦᠲᠡᠨ ᠮᠤᠩᠭᠤᠯ ᠠᠴᠠ ᠭᠠᠲᠠᠨ᠎ᠠ ᠲᠦᠪᠡᠳ᠂ ᠬᠠᠰᠠᠬ ᠯᠠ ᠪᠤᠢ ᠬᠡᠵᠤ ᠬᠡᠯᠡᠯᠴᠡᠲᠡᠭ᠃    ᠶᠠᠷᠢᠶᠠᠨ ᠦᠭᠡᠢ᠂ ᠠᠷᠭᠠᠯ ᠤᠨ ᠴᠢᠬᠤᠯᠠ ᠨᠢᠭᠡ ᠠᠰᠢᠬᠯᠠᠮᠵᠢ ᠬᠡᠷᠡᠭᠴᠡᠭᠡ ᠪᠤᠯ ᠰᠢᠲᠠᠭᠠᠯᠭ᠎ᠠ ᠲᠦᠯᠡᠰᠢ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠂ ᠲᠡᠷᠡ ᠪᠤᠯ ᠮᠤᠩᠭᠤᠯ᠂ ᠬᠠᠰᠠᠬ᠂ ᠲᠦᠪᠡᠳ ᠵᠡᠷᠭᠡ ᠨᠡᠬᠦᠲᠡᠯᠴᠢ ᠮᠠᠯᠵᠢᠯ ᠢᠶᠠᠷ ᠠᠮᠢᠲᠤᠷᠠᠲᠠᠭ ᠦᠨᠲᠦᠰᠦᠲᠡᠨ ᠨᠦᠭᠦᠳ ᠤᠨ ᠡᠬᠡ ᠪᠠᠶᠢᠭᠠᠯᠢ ᠯᠤᠭ᠎ᠠ ᠡᠶ᠎ᠡ ᠵᠤᠬᠢᠴᠠᠵᠤ᠂ ᠡᠪᠲᠡᠵᠦ ᠪᠦᠷᠢᠯᠭᠡᠬᠦ ᠪᠢᠰᠢ᠂ ᠦᠭᠲᠡᠭᠡᠵᠦ ᠦᠬᠦᠭᠦᠯᠬᠦ ᠪᠢᠰᠢ᠂ ᠡᠳ᠋ ᠪᠠᠶᠠᠯᠢᠬ ᠢ ᠡᠪᠲᠡᠢ ᠲᠡᠮᠲᠡᠢ ᠠᠰᠢᠬᠯᠠᠵᠤ ᠬᠡᠷᠡᠭᠯᠡᠭᠰᠡᠨ ᠨᠢᠭᠡᠨ ᠲᠤᠮᠤ ᠡᠬᠦᠲᠦᠯᠲᠡ ᠮᠦᠨ᠂ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ  ᠳᠤ ᠦᠵᠡᠬᠦᠯᠦᠭᠰᠡᠨ ᠴᠢᠮᠠᠯᠠᠰᠢ ᠦᠭᠡᠢ ᠨᠡᠮᠡᠷᠢ ᠬᠠᠨᠳᠢᠪᠯᠠᠯ ᠮᠦᠨ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠃ ᠨᠡᠬᠦᠲᠡᠯᠴᠢ ᠮᠤᠩᠭᠤᠯᠴᠤᠳ ᠬᠠᠮᠢᠭ᠎ᠠ ᠶᠠᠪᠤᠪᠠᠴᠤ ᠠᠷᠭᠠᠯ ᠠᠴᠠ ᠰᠠᠯᠵᠤ ᠴᠢᠲᠠᠬᠤ ᠦᠭᠡᠢ᠂ ᠨᠡᠬᠦᠵᠦ ᠪᠠᠭᠤᠬᠤ ᠳᠠᠭᠠᠨ ᠮᠤᠩᠭᠤᠯ ᠭᠡᠷ ᠤᠨ ᠢᠶᠠᠨ ᠬᠠᠮᠳᠤ ᠠᠮᠤ ᠬᠦᠨᠡᠰᠦ᠂ ᠲᠠᠪᠤᠰᠤ ᠲᠤᠰᠤ ᠪᠠᠨ ᠠᠪᠴᠤ ᠶᠠᠪᠤᠲᠠᠭ ᠤᠨ ᠬᠠᠮᠳᠤ ᠪᠠᠭ᠎ᠠ ᠬᠡᠮᠵᠢᠶᠡᠨ ᠤ ᠴᠤ ᠭᠡᠰᠡᠨ ᠠᠷᠭᠠᠯ ᠠᠪᠴᠤ᠂ ᠬᠤᠷ᠎ᠠ ᠪᠤᠷᠤᠭᠠᠨ ᠴᠢᠬᠢᠭ ᠨᠦᠢᠲᠠᠨ ᠳᠤ ᠬᠡᠷᠡᠭᠯᠡᠬᠦ ᠪᠡᠯᠡᠳᠭᠡᠮᠵᠢ ᠪᠤᠯᠭᠠᠨ᠎ᠠ᠂ ᠮᠠᠯᠴᠢᠨ ᠬᠦᠮᠦᠨ ᠠᠷᠤᠬ ᠢ ᠮᠦᠷᠦᠨ ᠠᠴᠠ ᠪᠠᠨ᠂ ᠰᠠᠪᠠᠷ ᠢ ᠴᠤ ᠭᠠᠷ ᠠᠴᠠ ᠪᠠᠨ ᠰᠠᠯᠭᠠᠲᠠᠭ ᠦᠭᠡᠢ᠂ ᠬᠠᠮᠢᠭ᠎ᠠ ᠬᠦᠷᠦᠭᠡᠳ ᠪᠠᠭᠤᠵᠤ ᠰᠠᠭᠤᠬᠤ ᠳᠤ ᠯᠠ ᠴᠠᠢ ᠬᠤᠭᠤᠯᠠᠨ ᠤ ᠪᠠᠨ ᠴᠢᠯᠦᠭᠡᠨ ᠳᠤ ᠭᠡᠰᠡᠨ ᠴᠤ ᠠᠷᠤᠭ ᠢᠶᠠᠨ ᠡᠬᠦᠷᠴᠦ ᠭᠠᠷᠤᠭᠠᠳ ᠬᠠᠪᠢ ᠲᠦᠰᠦᠷ ᠤᠨ ᠠᠷᠭᠠᠯ ᠢ ᠲᠡᠬᠦᠵᠤ ᠢᠷᠡᠲᠡᠭ᠂ ᠬᠤᠨᠢᠴᠢᠨ ᠬᠤᠷᠠᠭᠠᠴᠢᠨ ᠴᠤ ᠰᠦᠷᠦᠭ ᠢᠶᠠᠨ ᠲᠠᠭᠤᠵᠤ ᠭᠠᠷᠤᠭᠠᠳ ᠮᠠᠯ ᠤᠨ ᠠᠷᠤ ᠠᠴᠠ ᠶᠠᠪᠤᠬᠤ ᠳᠠᠭᠠᠨ ᠤᠯᠲᠠᠬᠰᠠᠨ ᠠᠷᠭᠠᠯ ᠢᠶᠠᠨ ᠲᠡᠬᠦᠵᠦ᠂ ᠲᠤᠬᠢᠲᠠᠢ ᠨᠢᠭᠡ ᠭᠠᠵᠠᠷ ᠤᠪᠤᠭᠠᠯᠠᠵᠤ ᠲᠠᠯᠪᠢᠭᠠᠳ᠂ ᠬᠤᠵᠢᠮ ᠠᠯᠢ ᠨᠢᠭᠡ ᠵᠠᠪ ᠡᠶᠠᠷ ᠢᠶᠠᠨ ᠮᠤᠲᠤᠨ ᠲᠡᠷᠭᠡ ᠪᠠᠨ ᠭᠡᠯᠢᠵᠦ ᠢᠷᠡᠭᠡᠳ ᠲᠡᠭᠡᠭᠡᠵᠦ ᠠᠪᠠᠴᠢᠲᠠᠭ᠃ ᠲᠡᠨᠲᠦᠷ ᠮᠦᠨᠲᠦᠷ ᠬᠦᠯ ᠳᠤ ᠤᠷᠤᠵᠤ ᠪᠠᠶᠢᠭ᠎ᠠ ᠬᠡᠦᠬᠡᠳ ᠲᠡᠭᠡᠭᠰᠢ ᠭᠠᠷᠪᠠᠯ ᠠᠬᠲᠠ ᠶᠢᠨ ᠨᠢᠷᠤᠭᠤᠨ ᠳᠤ ᠰᠠᠵᠢᠬᠲᠠᠬᠤ᠂ ᠲᠤᠷᠤᠬᠰᠢ ᠪᠠᠭᠤᠪᠠᠯ ᠠᠷᠤᠭ ᠢ ᠨᠢᠷᠤᠭᠤᠨ ᠳᠠᠭᠠᠨ ᠡᠬᠦᠷᠬᠦ ᠨᠢ ᠮᠤᠩᠭᠤᠯ ᠠᠮᠢᠲᠤᠷᠠᠯ ᠤᠨ ᠬᠢᠨᠢ ᠲᠤᠲᠠᠭᠲᠠᠵᠤ ᠪᠤᠯᠤᠰᠢ ᠦᠭᠡᠢ ᠦᠨᠲᠦᠰᠦᠨ ᠬᠢᠴᠢᠶᠡᠯ ᠠᠩᠬᠠᠨ ᠤ ᠲᠠᠰᠬᠠᠯ ᠨᠢ ᠰᠠᠨ᠃    ᠮᠠᠯᠴᠢᠳ ᠤᠨ ᠵᠤᠳ ᠲᠠᠢ ᠵᠤᠨ ᠲᠠᠢ ᠠᠮᠢᠲᠤᠷᠠᠯ ᠠᠷᠭᠠᠯ ᠠᠴᠠ ᠰᠠᠯᠵᠤ ᠦᠯᠦ ᠪᠤᠯᠤᠨ᠎ᠠ᠂ ᠠᠷᠭᠠᠯ ᠢᠶᠠᠨ ᠲᠦᠯᠡᠵᠦ ᠴᠠᠢ ᠪᠠᠨ ᠴᠢᠨᠠᠨ᠎ᠠ᠂ ᠮᠢᠬ᠎ᠠ ᠴᠢᠨᠠᠨ᠎ᠠ᠂ ᠰᠦ ᠰᠠᠭᠠᠯᠢ ᠪᠠᠨ ᠪᠤᠯᠪᠠᠰᠤᠷᠠᠭᠤᠯᠵᠤ ᠴᠠᠭᠠᠨ ᠢᠲᠡᠭᠡ ᠡᠳ᠋ᠰᠢᠬᠦᠯᠦᠨ᠎ᠡ᠂ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠨᠡᠷᠡᠨ᠎ᠡ᠂ ᠠᠯᠢᠨ ᠳᠤᠨᠢ ᠠᠷᠭᠠᠯ ᠲᠤᠲᠠᠵᠤ ᠪᠤᠯᠬᠤ ᠶᠤᠮ ᠪᠤᠢ︖ ᠴᠡᠯ ᠨᠤᠭᠤᠭᠠᠨ ᠲᠠᠯ᠎ᠠ ᠶᠢᠨ ᠦᠷᠦᠴᠡᠨ ᠳᠤ ᠬᠤᠨ ᠴᠠᠭᠠᠨ ᠮᠤᠩᠭᠤᠯ ᠭᠡᠷ ᠤᠳ ᠴᠠᠶᠢᠷᠠᠵᠤ᠂ ᠲᠤᠭᠤᠨᠤ ᠪᠠᠷ ᠨᠢ ᠴᠡᠩᠬᠡᠷ ᠤᠳᠤᠭ᠎ᠠ ᠰᠤᠭᠤᠨᠠᠬᠯᠠᠵᠤ᠂ ᠬᠠᠯᠠᠭᠤᠨ ᠠᠮᠢᠲᠤᠷᠠᠯ ᠲᠡᠨᠲᠡ ᠪᠤᠴᠠᠯᠵᠤ᠂ ᠠᠶᠢᠯ ᠡᠷᠦᠬᠡ ᠪᠠᠶᠢᠬᠤ ᠶᠢᠨ ᠲᠡᠮᠲᠡᠭ ᠪᠤᠯᠵᠤ᠂ ᠠᠶᠠᠨ ᠤ ᠬᠦᠮᠦᠰ ᠤᠨ ᠠᠬᠲᠠ ᠶᠢᠨ ᠵᠢᠯᠤᠭᠤ ᠶᠢ ᠲᠡᠷᠡ ᠲᠡᠶᠢᠰᠢ ᠵᠠᠯᠠᠭᠤᠯᠲᠠᠭ ᠪᠢᠯᠠ᠃    ᠲᠤᠯᠭ᠎ᠠ ᠪᠤᠯ ᠨᠡᠬᠦᠲᠡᠯᠴᠢ ᠠᠮᠢᠲᠤᠷᠠᠯ ᠳᠤ ᠲᠤᠲᠠᠭᠲᠠᠵᠦ ᠪᠤᠯᠤᠰᠢ ᠦᠭᠡᠢ ᠠᠮᠢᠲᠤᠷᠠᠯ ᠤᠨ ᠬᠡᠷᠡᠭᠰᠡᠯ᠂ ᠲᠡᠬᠡᠬᠦᠯᠡᠷ ᠮᠤᠩᠭᠤᠯᠴᠤᠳ ᠤᠨ ᠬᠡᠷᠡᠭᠯᠡᠲᠡᠭ ᠭᠤᠷᠪᠠᠯᠵᠢᠨ ᠲᠤᠯᠭ᠎ᠠ᠂ ᠲᠦᠷᠪᠡᠯᠵᠢᠨ ᠲᠤᠯᠭ᠎ᠠ᠂ ᠠᠲᠠᠷ ᠲᠠᠢ ᠲᠤᠯᠭ᠎ᠠ᠂ ᠠᠲᠠᠷ ᠦᠭᠡᠢ ᠲᠤᠯᠭ᠎ᠠ᠂ ᠰᠡᠨᠵᠢ ᠲᠠᠢ ᠲᠤᠯᠭ᠎ᠠ᠂ ᠰᠡᠨᠵᠢ ᠦᠭᠡᠢ ᠲᠤᠯᠭ᠎ᠠ᠂ ᠡᠪᠬᠡᠭᠦᠷ ᠲᠤᠯᠭ᠎ᠠ ᠵᠡᠷᠭᠡ ᠤᠯᠠᠨ ᠶᠠᠩᠵᠤ ᠬᠡᠯᠪᠡᠷᠢ ᠶᠢᠨ ᠪᠠᠶᠢᠲᠠᠭ᠂ ᠠᠶᠠᠨ ᠲᠤᠭᠤᠰᠤᠨ ᠳᠤ ᠶᠠᠪᠤᠬᠤ ᠳᠤ ᠰᠡᠨᠵᠢ ᠲᠠᠢ ᠲᠤᠯᠭ᠎ᠠ ᠪᠠᠨ ᠮᠤᠳᠤᠨ ᠲᠡᠷᠭᠡ ᠶᠢᠨ ᠢᠶᠠᠨ ᠠᠷᠠᠯ ᠠᠴᠠ ᠡᠯᠬᠦᠵᠦ᠂ ᠡᠪᠬᠡᠲᠡᠭ ᠲᠤᠯᠭ᠎ᠠ ᠪᠠᠨ ᠮᠤᠷᠢᠨ ᠡᠮᠡᠭᠡᠯ ᠤᠨ ᠢᠶᠠᠨ ᠭᠠᠨᠵᠤᠭ᠎ᠠ ᠠᠴᠠ ᠨᠢ ᠭᠠᠨᠵᠤᠭᠠᠯᠠᠭᠠᠳ ᠶᠠᠪᠤᠵᠤ ᠪᠤᠯᠲᠠᠬ᠃ ᠬᠡᠭᠡᠷ᠎ᠡ ᠬᠦᠲᠡᠭᠡ ᠭᠡᠨᠡᠦᠡᠲᠡ ᠶᠢᠨ ᠲᠤᠬᠢᠶᠠᠯᠳᠤᠯ ᠢᠶᠠᠷ ᠲᠤᠭᠤᠭᠠᠯᠠᠬᠤ ᠶᠠᠪᠤᠲᠠᠯ ᠲᠠᠭᠠᠷᠠᠪᠠᠯ ᠬᠠᠪᠢ ᠲᠦᠰᠦᠷ ᠠᠴᠠ ᠪᠠᠨ ᠠᠷᠭᠠᠯ ᠲᠡᠬᠦᠵᠦ ᠬᠤᠷᠮᠦ᠋ᠢᠯᠠᠵᠤ ᠠᠪᠴᠢᠷᠠᠭᠠᠳ᠂ ᠲᠤᠯᠭ᠎ᠠ ᠪᠡᠯᠡᠨ ᠪᠠᠶᠢᠬᠤ ᠦᠭᠡᠢ ᠪᠤᠯ ᠭᠤᠷᠪᠠᠨ ᠴᠢᠯᠠᠭᠤ ᠵᠡᠷᠭᠡᠯᠡᠨ ᠲᠤᠭᠤᠭ᠎ᠠ ᠪᠠᠨ ᠲᠠᠯᠪᠢᠭᠠᠳ ᠲᠤᠤᠷ᠎ᠠ ᠠᠴᠠ ᠨᠢ ᠠᠷᠭᠠᠯ ᠤᠨ ᠭᠠᠯ ᠢᠶᠠᠨ ᠲᠦᠯᠡᠪᠡᠯ ᠴᠠᠢ ᠪᠤᠲᠠᠭ᠎ᠠ ᠪᠠᠨ ᠪᠤᠯᠭᠤᠭᠠᠴᠢᠬᠠᠲᠠᠬ᠂ ᠢᠡᠭᠬᠢᠬᠦ ᠳᠡᠭᠡᠨ ︽ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ︾ ᠪᠠᠷ ᠠᠵᠢᠯ ᠦᠢᠯᠡᠰ ᠡᠬᠢᠯᠡᠵᠦ ᠪᠤᠰᠬᠠᠬᠤ ᠰᠠᠭᠤᠷᠢ ᠲᠠᠯᠪᠢᠬᠤ ᠶᠢ ᠵᠦᠢᠷᠯᠡᠲᠡᠭ ᠤᠨ ᠤᠴᠢᠷ ᠨᠢ ᠠᠲᠡ ᠪᠠᠶᠢᠨ᠎ᠠ᠂ ᠶᠡᠭᠡ ᠵᠢᠩ ᠲᠠᠢ ᠦᠭᠡ᠃     ︽ᠤᠲᠤᠭ᠎ᠠ ᠲᠠᠢ ᠭᠡᠷ ᠲᠤᠯᠠᠭᠠᠨ᠂ ᠤᠩᠭᠠᠰᠤ ᠲᠠᠢ ᠭᠡᠷ ᠪᠠᠶᠠᠨ︾ ᠭᠡᠲᠡᠭ ᠮᠤᠩᠭᠤᠯ ᠵᠦᠢᠷ ᠦᠭᠡ ᠡᠷᠲᠡ ᠭᠠᠷᠴᠠᠢ᠃ ᠰᠠᠭᠤᠷᠢᠰᠢᠬᠰᠠᠨ ᠮᠤᠩᠭᠤᠯ ᠠᠶᠢᠯ ᠲᠤᠰᠬᠤᠨ ᠲᠤ ᠠᠷᠭᠠᠯ ᠤᠨ ᠤᠪᠤᠭ᠎ᠠ ᠨᠢ ᠨᠢᠭᠡ ᠵᠦᠢᠯ ᠤᠨ ᠪᠡᠯᠭᠡ ᠲᠡᠮᠲᠡᠭ᠂ ᠶᠠᠷᠢᠶᠠᠨ ᠦᠭᠡᠢ ᠮᠠᠯ ᠤᠨ ᠲᠤᠭ᠎ᠠ ᠨᠢ ᠨᠢᠭᠡ ᠠᠶᠢᠯ ᠤᠨ ᠪᠠᠶᠠᠨ ᠲᠠᠷᠭᠤᠨ ᠤ ᠴᠢᠬᠤᠯᠠ ᠦᠨᠲᠦᠰᠦᠯᠡᠯ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠂ ᠭᠡᠪᠡᠴᠤ ᠬᠡᠨ ᠤ ᠬᠢᠨᠢ ᠬᠡᠲᠦᠢ ᠮᠠᠯ ᠲᠠᠢ ᠶᠤᠮ ᠪᠤᠢ ᠭᠡᠵᠦ ᠤᠴᠢᠭᠠᠳ ᠲᠤᠭᠠᠯᠠᠯᠲᠠᠢ ᠪᠢᠰᠢ᠂ ᠭᠠᠲᠠᠨ᠎ᠠ ᠠᠴᠠ ᠨᠢ ᠬᠠᠷᠠᠬᠤ ᠳᠤ ᠯᠠ ᠠᠯᠢ ᠠᠶᠢᠯ ᠤᠨ ᠭᠠᠲᠠᠨᠠᠬᠢ ᠠᠷᠭᠠᠯ ᠤᠨ ᠤᠪᠤᠭ᠎ᠠ ᠨᠢ ᠲᠤᠮᠤ᠂ ᠲᠡᠷᠢ ᠲᠡᠭᠰᠢ ᠲᠠᠯᠠᠩᠯᠠᠵᠤ ᠤᠪᠤᠭᠠᠯᠠᠬᠰᠠᠨ ᠪᠤᠯ ᠲᠡᠷᠡ ᠠᠶᠢᠯ ᠤᠨ ᠡᠵᠡᠨ ᠨᠢ ᠠᠵᠢᠯᠴᠢ ᠬᠦᠲᠡᠯᠮᠦᠷᠢᠴᠢ᠂ ᠲᠡᠷᠡ ᠠᠶᠢᠯ ᠤᠨ ᠠᠮᠢᠲᠤᠷᠠᠯ ᠠᠬᠤᠢ ᠨᠢ ᠦᠨᠢᠷ ᠦᠷᠨᠢᠬᠦᠨ ᠲᠦᠪᠬᠢᠨᠡᠬᠦᠨ ᠲᠡᠪᠬᠡᠷᠡᠬᠦᠨ ᠨᠢ ᠮᠡᠲᠡᠭᠲᠡᠵᠦ᠂ ᠬᠦᠮᠦᠰ ᠤᠨ ᠪᠢᠰᠢᠷᠡᠯ ᠪᠠᠭ᠋ᠠᠷᠤᠯ ᠢ ᠤᠯᠲᠠᠭ᠃    ᠬᠦᠲᠡᠭᠡ ᠳᠤ ᠦᠬᠡᠷ ᠤᠨ ᠪᠠᠭᠠᠰᠤ ᠨᠢ ᠲᠦᠯᠡᠰᠢ ᠰᠢᠲᠠᠭᠠᠯᠭ᠎ᠠ ᠠᠴᠠ ᠭᠠᠲᠠᠨ᠎ᠠ ᠪᠠᠰᠠ ᠤᠨᠳᠤᠤ ᠵᠦᠢᠯ ᠤᠨ ᠬᠡᠷᠡᠭᠴᠡᠭᠡ ᠲᠠᠢ᠃ ᠮᠠᠩᠬᠠᠯᠢᠬ ᠤᠷᠤᠨ ᠤ ᠮᠠᠯᠴᠢᠳ ᠪᠤᠷᠭᠠᠰᠤᠨ ︵ᠰᠢᠪᠡᠭᠡᠨ︶ ᠬᠠᠰᠢᠶ᠎ᠠ ᠪᠠᠷᠢᠵᠤ᠂ ᠵᠤᠨ ᠤ ᠤᠯᠠᠷᠢᠯ ᠳᠤ ᠰᠢᠩᠭᠡᠨ ᠦᠬᠡᠷ ᠤᠨ ᠪᠠᠭᠠᠰᠤᠨ ᠳᠤ ᠵᠢᠭᠠᠬᠠᠨ ᠰᠢᠪᠠᠷ᠂ ᠲᠠᠷᠢᠶᠠᠨ ᠰᠦᠷᠡᠯ ᠪᠤᠶᠤ ᠬᠠᠭᠤᠷᠠᠢ ᠡᠪᠡᠰᠦ ᠬᠤᠯᠢᠵᠤ ᠪᠤᠷᠭᠠᠰᠤᠨ ᠬᠠᠰᠢᠶᠠᠨ ᠤ ᠪᠠᠨ ᠭᠠᠲᠠᠭᠤᠷ ᠰᠢᠪᠠᠲᠠᠭ᠂ ᠢᠡᠭᠬᠢᠪᠡᠯ ᠡᠪᠦᠯ ᠳᠡᠭᠡᠨ ᠬᠠᠰᠢᠶ᠎ᠠ ᠨᠢ ᠡᠭᠡᠪᠦᠷ ᠲᠤᠯᠠᠭᠠᠨ ᠪᠤᠯᠵᠤ᠂ ᠵᠤᠨ ᠳᠠᠭᠠᠨ ᠱᠠᠭᠠᠯᠵᠤ ᠠᠪᠤᠭᠠᠳ ᠲᠦᠯᠡᠲᠡᠭ᠃ ᠵᠠᠷᠢᠮ ᠨᠢ ᠮᠠᠯ ᠤᠨ ᠬᠠᠰᠢᠶ᠎ᠠ ᠪᠠᠨ ᠲᠤᠭᠤᠷᠢᠭᠤᠯᠤᠭᠠᠳ ᠠᠷᠭᠠᠯ ᠢᠶᠠᠨ ᠲᠠᠯᠠᠩᠯᠠᠵᠤ ᠬᠤᠷᠢᠶᠠᠲᠠᠭ ᠴᠤ ᠪᠤᠢ᠂ ᠪᠤᠷᠤᠭᠠᠨ ᠬᠤᠷ᠎ᠠ ᠳᠤ ᠨᠤᠷᠠᠵᠤ ᠰᠦᠢᠳᠬᠦ᠂ ᠮᠠᠯ ᠤᠨᠤᠭ᠎ᠠ ᠮᠦᠷᠬᠦᠵᠦ ᠱᠦᠷᠭᠦᠭᠡᠵᠦ ᠤᠨᠠᠭᠠᠬᠤ ᠠᠴᠠ ᠰᠡᠷᠭᠡᠶᠢᠯᠡᠵᠦ᠂ ᠠᠷᠭᠠᠯ ᠤᠨ ᠤᠪᠤᠭᠠᠨ ᠤ ᠪᠠᠨ ᠭᠠᠲᠠᠭᠤᠷ ᠪᠤᠷᠭᠠᠰᠤ ᠰᠢᠪᠡᠭᠡ ᠪᠤᠶᠤ ᠬᠦᠷᠦᠭᠰᠡᠨ ᠵᠠᠮᠪᠠ ᠪᠠᠷ ᠬᠠᠰᠢᠶ᠎ᠠ ᠪᠠᠷᠢᠲᠠᠭ᠃ ᠡᠨᠡ ᠨᠢ ᠮᠦᠨ ᠡᠪᠦᠯ ᠳᠡᠭᠡᠨ ᠰᠠᠯᠬᠢ ᠶᠢ ᠬᠠᠯᠬᠠᠯᠠᠵᠤ᠂ ᠮᠠᠯ ᠳᠠᠭᠠᠨ ᠨᠦᠮᠦᠷᠢ ᠪᠤᠯᠭᠠᠬᠤ ᠶᠢ ᠪᠤᠲᠤᠯᠬᠢᠯᠠᠬᠰᠠᠨ ᠪᠠᠶᠢᠲᠠᠭ᠃ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ ᠤᠷᠤᠨ ᠳᠤ᠂ ᠪᠤᠷᠭᠠᠰᠤ ᠪᠠᠷ ᠬᠦᠷᠦᠭᠰᠡᠨ ᠲᠤᠮᠤ ᠰᠠᠪᠠ ᠪᠠᠨ ᠲᠤᠲᠤᠭᠤᠷ ᠨᠢ ᠰᠢᠩᠭᠡᠨ ᠦᠬᠡᠷ ᠤᠨ ᠪᠠᠭᠠᠰᠤ ᠪᠠᠷ ᠮᠢᠯᠢᠶᠠᠭᠠᠳ ᠲᠤᠲᠤᠷ᠎ᠠ ᠨᠢ ᠬᠠᠷ᠎ᠠ ᠪᠤᠲᠠᠭ᠎ᠠ ᠬᠠᠲᠠᠭᠠᠯᠠᠪᠠᠯ ᠦᠲᠦᠵᠦ ᠬᠤᠷᠤᠬᠠᠶᠢᠲᠠᠬᠤ ᠥᠭᠡᠢ ᠨᠢ ᠮᠦᠨ ᠨᠢᠭᠡ ᠤᠴᠢᠷ ᠪᠤᠢ᠃ ᠶᠠᠭᠤ ᠬᠡᠯᠡᠭᠰᠡᠨ ᠴᠤ ᠠᠷᠭᠠᠯ ᠭᠡᠵᠦ ᠦᠪᠴᠢ ᠪᠡᠶ᠎ᠡ ᠪᠠᠷ ᠢᠶᠠᠨ ᠡᠷᠲᠡᠨᠢ ᠪᠠᠶᠢᠵᠤ ᠲᠠᠭᠠᠷᠠᠨ᠎ᠠ᠂ ᠬᠦᠲᠡᠭᠡ ᠬᠡᠭᠡᠷ᠎ᠡ ᠬᠠᠶᠠᠬᠲᠠᠬᠰᠠᠨ ᠨᠢ ᠴᠤ ᠭᠡᠳ ᠬᠠᠲᠠᠵᠤ ᠬᠤᠪᠠᠭ᠋ᠠᠶᠢᠷᠠᠵᠤ ᠦᠤᠵᠤ ᠢᠯᠵᠢᠷᠡᠭᠡᠳ ᠬᠦᠷᠦᠰᠦᠨ ᠳᠤ ᠰᠢᠮᠡᠳᠴᠦ ᠰᠢᠩᠭᠡᠭᠡᠳ ᠡᠪᠡᠰᠦ ᠤᠷᠭᠤᠮᠠᠯ ᠤᠨ ᠤᠷᠭᠤᠨ ᠲᠦᠯᠵᠢᠬᠦ ᠳᠤ ᠪᠤᠷᠲᠤᠭᠤᠷ ᠪᠤᠯᠵᠤ ᠰᠢᠮ᠎ᠡ ᠲᠡᠵᠢᠭᠡᠯ ᠬᠠᠩᠭᠠᠲᠠᠭ ᠶᠤᠮ ᠴᠢᠨᠢ᠃ ᠠᠷᠭᠠᠯ ᠡᠷᠳᠡᠨᠢ︕    
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ