 
 
 
 

 
 
ᠪᠠᠷᠭᠤ ᠨᠤᠲᠤᠭ ᠤᠨ ᠲᠡᠥᠬᠡᠲᠦ ᠬᠦᠮᠦᠰ
  
2018-12-05
   ᠨᠢᠭᠡ᠂ ᠵᠠᠮᠰᠦ᠋ᠷᠦᠩ ᠤᠨ ᠲᠠᠮᠳᠢᠨᠰᠦ᠋ᠷᠦᠩ                      ᠲᠠᠮᠳᠢᠨᠰᠦ᠋ᠷᠦᠩ ᠴᠢᠩ ᠤᠯᠤᠰ ᠤᠨ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶᠢᠨ ᠠᠷᠪᠠᠲᠤᠭᠠᠷ ᠤᠨ ︵1871 ᠤᠨ︶ ᠳᠤ ᠬᠦᠯᠦᠨ ᠪᠤᠶᠢᠷ  ᠤᠨ ᠰᠢᠨ᠎ᠡ ᠪᠠᠷᠭᠤ ᠵᠠᠭᠦᠨ ᠭᠠᠷ ᠤᠨ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠭᠤᠲᠠᠭᠠᠷ ᠰᠤᠮᠤᠨ ︵ᠤᠲᠤ ᠶᠢᠨ ᠰᠢᠨ᠎ᠡ ᠪᠠᠷᠭᠤ ᠵᠠᠭᠦᠨ ᠬᠤᠰᠢᠭᠤᠨ ᠤ ᠠᠮᠤᠭᠤᠯᠠᠩ ᠪᠤᠯᠠᠭ ᠰᠤᠮᠤ︶ ᠤ ᠬᠦᠢᠴᠡᠯᠢᠭ ᠬᠠᠯᠠ ᠶᠢᠨ ᠵᠠᠮᠰᠦ᠋ᠷᠦᠩ ᠤᠨ ᠬᠦᠪᠡᠭᠦᠨ ᠪᠤᠯᠤᠨ ᠴᠠᠭᠠᠨ ᠬᠤᠰᠢᠭᠤ ᠶᠢᠨ ᠤᠪᠤᠭᠠᠨ ᠤ ᠠᠷᠤ ᠳᠤ ᠬᠢ《 ᠠᠯᠲᠠᠨ ᠲᠡᠪᠰᠢ 》 ᠭᠡᠮᠡᠬᠦ ᠭᠠᠵᠠᠷ ᠵᠠᠶᠠᠭᠠᠵᠠᠢ᠃ ᠲᠡᠭᠦᠨ ᠤ ᠡᠴᠢᠭᠡ ᠵᠠᠮᠰᠦ᠋ᠷᠦᠩ ᠪᠤᠯᠪᠠᠰᠤ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠭᠤᠲᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠪᠦᠭᠡᠳ ᠠᠷᠠᠳ ᠤᠯᠠᠨ ᠤ ᠪᠠᠨ ᠲᠤᠮᠲᠠ《 ᠡᠮᠡᠭᠡᠨ ᠵᠠᠩᠬᠢ 》 ᠭᠡᠮᠡᠨ ᠠᠯᠲᠠᠷᠰᠢᠵᠠᠢ᠃ ᠵᠠᠮᠰᠦ᠋ᠷᠦᠩ ᠵᠠᠩᠬᠢ ᠶᠢᠨ ᠬᠠᠲᠤᠨ ᠤᠳᠪᠠᠯ᠎ᠠ ᠭᠡᠲᠡᠭ ᠤᠬᠠᠭᠠᠯᠢᠭ ᠰᠡᠷᠭᠦᠯᠡᠩ᠂ ᠵᠢᠰᠤ ᠴᠢᠷᠠᠢ ᠴᠡᠪᠡᠷ᠂ ᠪᠡᠶ᠎ᠡ ᠪᠠᠶᠢᠲᠠᠯ ᠭᠤᠩᠭᠠᠯᠢᠭ ᠰᠠᠶᠢᠬᠠᠨ ᠪᠦᠰᠡᠬᠦᠢ ᠪᠠᠶᠢᠵᠠᠢ᠃ ᠵᠠᠮᠰᠦ᠋ᠷᠦᠩ ᠤᠨ ᠬᠢ ᠲᠠᠪᠤᠨ ᠬᠦᠪᠡᠭᠦᠨ᠂ ᠲᠦᠷᠪᠡᠨ ᠦᠬᠢᠨ ᠲᠠᠢ ᠦᠨᠢᠷ ᠠᠶᠢᠯ ᠪᠠᠶᠢᠭᠰᠠᠨ ᠪᠠ ᠲᠠᠮᠳᠢᠨᠰᠦ᠋ᠷᠦᠩ ᠪᠤᠯᠪᠠᠰᠤ ᠵᠠᠮᠰᠦ᠋ᠷᠦᠩ ᠤᠨ ᠭᠤᠲᠠᠭᠠᠷ ᠬᠦᠪᠡᠭᠦᠨ ᠶᠤᠮᠰᠠᠨᠵᠠᠢ᠃ ᠵᠠᠮᠰᠦ᠋ᠷᠦᠩ ᠤᠨ ᠬᠦᠪᠡᠭᠦᠨ  ᠠᠴᠠ ᠱᠠᠭᠲᠠᠷᠵᠠ᠂ ᠲᠠᠮᠳᠢᠨᠰᠦ᠋ᠷᠦᠩ ᠨᠠᠷ ᠵᠠᠰᠠᠭ ᠲᠦᠷᠦ ᠶᠢᠨ ᠠᠯᠪᠠ ᠬᠠᠭᠠᠵᠤ᠂ ᠴᠡᠷᠢᠭ ᠤᠨ ᠠᠯᠪᠠᠨ ᠳᠤ ᠭᠠᠲᠠᠭᠰᠢ ᠶᠠᠪᠤᠵᠤ ᠳ᠋ᠠᠨᠪᠠ ᠭᠡᠲᠡᠭ ᠬᠦᠦ ᠨᠢ ᠰᠠᠬᠢᠯ ᠵᠠᠯᠠᠵᠤ ᠯᠠᠮᠠ ᠪᠤᠯᠤᠭᠰᠠᠨ ᠪᠤᠯᠪᠠᠴᠤ ᠰᠦᠮ᠎ᠡ ᠬᠡᠶᠢᠳ ᠲᠤᠷ ᠰᠠᠭᠤᠵᠤ ᠯᠠᠮᠠ ᠶᠢᠨ ᠴᠢᠭ ᠶᠢ ᠬᠦᠭᠡᠭᠡ ᠦᠭᠡᠢ᠂ ᠬᠠᠷᠢᠨ ᠮᠠᠯ ᠰᠦᠷᠦᠭ ᠢᠶᠠᠨ ᠠᠷᠠᠴᠢᠯᠠᠨ ᠬᠠᠮᠢᠶᠠᠷᠴᠦ᠂ ᠬᠦᠪᠡᠭᠦᠨ ᠪᠠᠬᠢ ᠨᠢ ᠨᠠᠷᠡᠲᠡᠢ ᠡᠮᠴᠢ ᠯᠠᠮᠠ ᠪᠤᠯᠤᠭᠰᠠᠨ ᠠᠵᠢ᠃ ᠦᠬᠢᠳ ᠤᠨ ᠲᠤᠲᠤᠷ᠎ᠠ ᠠᠴᠠ ᠲᠠᠮᠳᠢᠨᠰᠦ᠋ᠷᠦᠩ ᠤᠨ ᠡᠭᠡᠴᠢ ᠰᠧᠷᠵᠢᠮ᠎ᠠ ᠨᠢ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠬᠤᠶᠠᠲᠤᠭᠠᠷ ᠰᠤᠮᠤᠨ ᠤ ᠦᠶ᠎ᠡ ᠤᠯᠠᠷᠢᠨ ᠵᠠᠯᠭᠠᠮᠵᠢᠯᠠᠬᠤ ᠵᠠᠩᠬᠢ ᠡᠷᠡᠭᠽᠡᠨᠱᠤᠩᠨᠤ ᠶᠢᠨ ᠡᠬᠡᠨᠡᠷ ︵ᠡᠷᠬᠢᠮᠪᠠᠲᠦ ᠶᠢᠨ ᠲᠦᠷᠦᠭᠰᠡᠨ ᠡᠬᠡ︶ ᠪᠤᠯᠵᠤ᠂ ᠦᠬᠢᠨ ᠲᠡᠭᠦᠦ ᠨᠢ ᠰᠢᠨ᠎ᠡ ᠪᠠᠷᠭᠤ ᠪᠠᠷᠠᠭᠤᠨ ᠭᠠᠷ ᠤᠨ ᠬᠦᠪᠡᠭᠡᠲᠦ ᠬᠦᠬᠡ ᠬᠤᠰᠢᠭᠤᠨ ᠤ ᠬᠤᠶᠠᠲᠤᠭᠠᠷ ᠰᠤᠮᠤᠨ ᠤ ᠤᠯᠠᠭᠠᠨ ᠫᠢ ᠲᠠᠯᠠᠩᠭᠤᠳ ᠬᠠᠯᠠ  ᠶᠢᠨ ᠲᠤᠷᠵᠢᠵᠠᠪ ᠤᠨ ᠭᠦᠪᠡᠷᠢ ︵ᠮᠡᠷᠭᠡᠨ ᠭᠦ᠊᠂ ᠤᠭᠤᠷᠲᠠ︶ ᠶᠢᠨ ᠡᠬᠡᠨᠡᠷ ᠪᠤᠯᠤᠭᠰᠠᠨ ᠠᠵᠢ᠃                ᠵᠠᠮᠰᠦ᠋ᠷᠦᠩ ᠤᠨ ᠲᠡᠭᠡᠳᠦᠬᠦᠯ ᠨᠢ ᠨᠡᠷᠡᠲᠡᠢ ᠪᠠᠶᠠᠨ ᠠᠶᠢᠯ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠡᠭᠦᠨ ᠤ ᠦᠶ᠎ᠡ ᠳᠤ ᠴᠦ ᠠᠲᠤᠭᠤ 1000 ᠭᠠᠷᠤᠢ᠂ ᠦᠬᠡᠷ 200— 300᠂ ᠲᠡᠮᠡᠭᠡ 200᠂ ᠪᠤᠭ ᠮᠠᠯ ᠨᠢ 3000—4000 ᠤᠷᠴᠢᠮ ᠪᠠᠶᠢᠵᠠᠢ᠃ ᠵᠠᠮᠰᠦ᠋ᠷᠦᠩ ᠨᠢᠭᠡ ᠤᠲᠠᠭᠠᠨ ᠤ ᠮᠠᠯ ᠤᠨ ᠠᠷᠠᠯᠵᠢᠶᠠᠨ ᠳᠤ ᠠᠬᠲᠠ ᠮᠤᠷᠢ 80᠂ ᠠᠲᠠᠨ ᠲᠡᠮᠡᠭᠡ 30 ᠶᠢ ᠬᠤᠲᠠᠯᠲᠤᠵᠤ᠂ ᠬᠤᠲᠠᠯᠲᠤᠭᠰᠠᠨ ᠪᠦᠬᠦᠲᠡ ᠵᠤᠭᠤᠰ ᠨᠢ 4650 ᠯᠠᠩ ᠴᠠᠭᠠᠨ ᠮᠦᠩᠬᠦ ᠪᠤᠯᠤᠭᠰᠠᠨ ᠭᠡᠲᠡᠭ ᠶᠠᠷᠢᠶ᠎ᠠ ᠪᠤᠢ᠃ ᠵᠠᠮᠰᠦ᠋ᠷᠦᠩ ᠤᠨ ᠲᠡᠭᠡᠳᠦᠬᠦᠯ ᠳᠤ ᠲᠤᠮᠤ ᠲᠤᠰᠢᠶᠠᠯ ᠦᠨᠲᠦᠷ ᠭᠡᠷᠭᠢᠮ ᠬᠦᠯᠢᠶᠡᠭᠰᠡᠨ ᠬᠦᠮᠦᠨ ᠦᠭᠡᠢ ᠪᠤᠯᠪᠠᠴᠦ ᠭᠠᠷ᠂ ᠬᠤᠰᠢᠭᠤ᠂ ᠰᠤᠮᠤᠨ ᠳᠤ ᠵᠡᠷᠭᠡ ᠵᠢᠩᠰᠠ ᠲᠠᠢ ᠶᠠᠪᠤᠭᠰᠠᠨ ᠬᠦᠮᠦᠰ ᠴᠦᠭᠡᠨ ᠦᠭᠡᠢ ᠰᠡᠨ᠃ ᠵᠠᠮᠰᠦ᠋ᠷᠦᠩ ᠤᠨ ᠭᠠᠲᠠᠭᠠᠷ ᠬᠦᠪᠡᠭᠦᠨ ᠲᠠᠮᠳᠢᠨᠰᠦ᠋ᠷᠦᠩ᠂ ᠠᠬ᠎ᠠ ᠲᠡᠭᠦᠦ ᠨᠠᠷ ᠠᠴᠠ ᠪᠠᠨ ᠲᠦᠷᠭᠡᠨ ᠵᠠᠩ᠂ ᠬᠠᠲᠠᠭᠤ ᠦᠭᠡ᠂ ᠴᠢᠩᠭ᠎ᠠ ᠵᠤᠷᠢᠭ᠂ ᠰᠡᠷᠭᠦᠯᠡᠩ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠡᠷᠡᠰ ᠰᠢᠯᠭᠠᠷᠠᠨ ᠲᠤᠲᠤᠷᠠᠵᠤ ᠪᠠᠶᠢᠭᠰᠠᠨ ᠤᠴᠢᠷ᠂ ᠲᠡᠭᠦᠨ ᠤ ᠡᠴᠢᠭᠡ ᠨᠢ ᠲᠠᠮᠳᠢᠨᠰᠦ᠋ᠷᠦᠩ ᠢ ᠨᠠᠢᠮᠠᠨ ᠨᠠᠰᠤᠲᠠᠢ ᠳᠤ ᠨᠢ ᠲᠤᠰ ᠬᠤᠰᠢᠭᠤᠨ ᠤ ᠪᠠᠨ ᠯᠤᠲᠤ ᠪᠢᠴᠢᠭᠡᠴᠢ ᠭᠡᠭᠴᠢ ᠪᠠᠷ ᠪᠠᠭᠰᠢ ᠵᠠᠯᠠᠵᠤ᠂ ᠮᠠᠨᠵᠤ᠂ ᠮᠤᠩᠭᠤᠯ ᠪᠢᠴᠢᠭ ᠵᠢᠭᠠᠯᠭᠠᠵᠠᠢ᠃ ᠲᠠᠮᠳᠢᠨᠰᠦ᠋ᠷᠦᠩ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨ ᠳᠠᠭᠠᠨ ᠰᠢᠨ᠎ᠡ ᠪᠠᠷᠭᠤ ᠵᠠᠭᠦᠨ ᠭᠠᠷ ᠤᠨ ᠶᠠᠮᠤᠨ  ᠤ ᠲᠤᠰᠠᠯᠠᠭᠴᠢ ᠪᠢᠴᠢᠭᠡᠴᠢ ᠪᠤᠯᠵᠠᠢ᠃ 1889 ᠤᠨ ᠳᠤ ᠠᠷᠪᠠᠨ ᠨᠠᠢᠮᠠᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠤᠶᠠᠭ ᠴᠡᠷᠢᠭ ᠪᠤᠯᠵᠤ ᠴᠡᠷᠢᠭ ᠤᠨ ᠡᠷᠲᠡᠮ ᠢ ᠰᠢᠮᠲᠠᠨ ᠰᠤᠷᠴᠤ ᠮᠡᠷᠭᠡᠨ ᠫᠤᠤᠲᠠᠭᠴᠢ ᠪᠤᠯᠪᠠ᠃ ᠵᠠᠯᠠᠭᠤ ᠨᠠᠰᠤᠨ ᠤ ᠲᠠᠮᠳᠢᠨᠰᠦ᠋ᠷᠦᠩ ᠡᠶᠢᠨᠬᠦ ᠪᠢᠴᠢᠭ ᠴᠡᠷᠢᠭ ᠤᠨ ᠡᠷᠲᠡᠮ  ᠳᠤ ᠮᠡᠷᠭᠡᠰᠢᠭᠰᠡᠨ ᠤᠴᠢᠷ 1891 ᠤᠨ ᠳᠤ ᠬᠤᠷᠢᠨ ᠨᠠᠰᠤᠲᠠᠢ ᠳᠠᠭᠠᠨ ᠰᠢᠨ᠎ᠡ ᠪᠠᠷᠭᠤ ᠵᠠᠭᠦᠨ ᠭᠠᠷ ᠤᠨ ᠶᠠᠮᠤᠨ ᠤ ᠲᠡᠷᠢᠭᠦᠨ ᠪᠢᠴᠢᠭᠡᠴᠢ ᠪᠤᠯᠤᠨ ᠲᠡᠪᠰᠢᠵᠡᠢ᠃ ᠲᠡᠷᠡ ᠲᠡᠷᠢᠭᠦᠨ ᠪᠢᠴᠢᠭᠡᠴᠢ ᠪᠠᠷ ᠵᠢᠷᠭᠤᠭᠠᠨ ᠵᠢᠯ ᠠᠵᠢᠯᠯᠠᠵᠤ᠂ ᠪᠠᠲᠠᠷᠠᠭᠤᠯᠲᠤ ᠲᠦᠷᠦ ᠶᠢᠨ ᠬᠤᠷᠢᠨ ᠬᠤᠶᠠᠲᠤᠭᠠᠷ ᠤᠨ ︵1896 ᠤᠨ︶ ᠳᠤ ᠬᠤᠷᠢᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠷ᠎ᠠ ᠮᠦᠷᠡᠨ ᠮᠤᠵᠢ ᠶᠢᠨ ᠵᠠᠩᠵᠤᠨ ᠶᠠᠮᠤᠨ ᠤ ᠵᠦᠪᠰᠢᠶᠡᠷᠡᠯ ᠲᠠᠢ ᠪᠠᠷ ᠰᠤᠮᠤᠨ ᠤ ᠬᠠᠹᠡᠨ ︵ᠤᠷᠤᠯᠠᠨ ᠬᠦᠭᠡᠭᠴᠢ︶ ᠢᠶᠠᠷ ᠲᠤᠮᠢᠯᠠᠭᠲᠠᠵᠠᠢ᠃ ᠬᠠᠷ᠎ᠠ ᠮᠦᠷᠡᠨ ᠮᠤᠵᠢ ᠶᠢᠨ ᠵᠠᠩᠵᠤᠨ ᠶᠠᠮᠤᠨ ᠠᠴᠠ ᠬᠠᠹᠡᠨ ᠪᠤᠯᠭᠠᠬᠤ ᠳᠠᠭᠠᠨ《 ᠲᠦᠰᠢᠮᠡᠯ ᠬᠦᠮᠦᠨ ᠤ ᠶᠠᠪᠤᠲᠠᠯ ᠶᠠᠭᠤ ᠶᠢ ᠴᠢᠬᠤᠯᠠ ᠪᠤᠯᠭᠠᠵᠤ᠂ ᠶᠠᠭᠤ ᠶᠠᠭᠤ  ᠶᠢ ᠴᠡᠭᠡᠷᠯᠡᠯ ᠪᠤᠯᠭᠠᠮᠤᠢ︖》ᠬᠡᠮᠡᠭᠰᠡᠨ ᠰᠢᠯᠭᠠᠯᠲᠠ ᠶᠢᠨ ᠰᠡᠲᠤᠪ ᠦᠭᠬᠦᠭᠰᠡᠨ ᠳᠤ ᠲᠠᠮᠳᠢᠨᠰᠦ᠋ᠷᠦᠩ ᠠᠴᠠ《 ᠲᠦᠰᠢᠮᠡᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠦᠷᠦᠰᠢᠶᠡᠯ ᠵᠢᠷᠤᠮ᠂ ᠬᠢᠴᠢᠶᠡᠩᠬᠦᠢ ᠪᠤᠯᠭᠤᠮᠵᠢᠲᠠᠢ᠂ ᠴᠡᠪᠡᠷ ᠢᠴᠢᠮᠡᠲᠡᠭᠡᠢ ᠶᠢ ᠴᠢᠬᠤᠯᠠ ᠪᠤᠯᠭᠠᠵᠤ᠂ ᠬᠠᠷᠬᠢᠰ ᠵᠠᠯᠢᠬᠠᠢ᠂ ᠤᠰᠤᠯ ᠤᠮᠤᠷᠬᠠᠭ᠂ ᠬᠤᠪᠲᠤᠭ ᠰᠢᠨᠤᠬᠠᠢ ᠶᠢ ᠴᠡᠭᠡᠷᠯᠡᠯ ᠪᠤᠯᠭᠠᠮᠤᠢ 》ᠭᠡᠮᠡᠨ ᠪᠢᠴᠢᠵᠦ ᠬᠠᠷᠢᠭᠤᠯᠵᠠᠢ᠃ ᠲᠠᠮᠳᠢᠨᠰᠦ᠋ᠷᠦᠩ ᠤᠷᠤᠯᠠᠨ ᠬᠦᠭᠡᠭᠴᠢ ᠶᠢᠨ ᠲᠤᠰᠢᠶᠠᠯ ᠳᠤ ᠲᠦᠷᠪᠡᠨ ᠵᠢᠯ ᠠᠵᠢᠯᠯᠠᠭᠠᠳ᠂ ᠪᠠᠲᠠᠷᠠᠭᠤᠯᠲᠤ ᠲᠦᠷᠦ ᠶᠢᠨ ᠬᠤᠷᠢᠨ ᠵᠢᠷᠭᠤᠲᠤᠭᠠᠷ ᠤᠨ ︵1900 ᠤᠨ︶ ᠳᠤ ᠭᠤᠴᠢᠨ ᠨᠠᠰᠤᠲᠠᠢ ᠳᠠᠭᠠᠨ ᠰᠢᠯᠤᠭᠤᠨ ᠴᠠᠭᠠᠨ ᠬᠤᠰᠢᠭᠤᠨ ᠤ ᠭᠤᠲᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠪᠤᠯᠤᠨ ᠲᠡᠪᠰᠢᠵᠡᠢ᠃ ᠰᠢᠷ᠎ᠠ ᠪᠡᠴᠢᠨ ᠵᠢᠯ ᠪᠤᠶᠤ 1908 ᠤᠨ ᠳᠤ ᠲᠠᠮᠳᠢᠨᠰᠦ᠋ᠷᠦᠩ ᠡᠵᠡᠨ ᠬᠠᠭᠠᠨ ᠳᠤ ᠪᠠᠷᠠᠭᠠᠲᠠᠬᠤ ᠪᠠᠷ ᠪᠡᠭᠡᠵᠢᠩ ᠳᠤ ᠬᠦᠷᠦᠭᠰᠡᠨ ᠳᠤ ᠪᠠᠲᠠᠷᠠᠭᠤᠯᠲᠤ ᠬᠠᠭᠠᠨ ᠦᠭᠡᠳ᠋ᠨ ᠪᠤᠯᠵᠤ ᠬᠠᠭᠤᠴᠢᠨ ᠬᠠᠭᠠᠨ ᠤ ᠪᠡᠯᠪᠡᠰᠦᠷᠡᠯ᠂ ᠰᠢᠨ᠎ᠡ ᠬᠠᠭᠠᠨ ᠰᠢᠷᠡᠭᠡᠨ ᠳᠤ ᠰᠠᠭᠤᠬᠤ ᠶᠤᠰᠤᠯᠠᠯ ᠵᠡᠷᠭᠡ ᠲᠠᠪᠬᠤᠴᠠᠭᠰᠠᠨ ᠤ ᠤᠯᠠᠮ ᠢᠶᠠᠷ ᠲᠠᠮᠳᠢᠨᠰᠦ᠋ᠷᠦᠩ ᠪᠡᠭᠡᠵᠢᠩ ᠳᠤ ᠤᠯᠠᠨ ᠰᠠᠷ᠎ᠠ ᠡᠲᠦᠷ ᠰᠠᠭᠤᠬᠤ ᠳᠠᠭᠠᠨ ᠲᠤᠬᠠᠢ ᠶᠢᠨ ᠦᠶ᠎ᠡ ᠪᠡᠭᠡᠵᠢᠩ ᠳᠤ ᠢᠷᠡᠭᠡᠳ ᠪᠠᠶᠢᠭᠰᠠᠨ ᠬᠠᠯᠬ᠎ᠠ ᠶᠢᠨ ᠲᠦᠰᠢᠶᠡᠲᠦ ᠬᠠᠨ ᠠᠶᠢᠮᠠᠭ ᠤᠨ ᠵᠠᠩᠵᠤᠨ ᠬᠠᠨᠳᠤᠲᠤᠷᠵᠢ ᠲᠠᠢ ᠤᠴᠠᠷᠠᠨ ᠲᠠᠨᠢᠯᠴᠠᠵᠤ ᠲᠤᠲᠤᠨᠤ ᠨᠦᠬᠦᠳ ᠪᠤᠯᠤᠯᠴᠠᠨ᠂ ᠮᠠᠨᠵᠤ ᠶᠢᠨ ᠲᠦᠷᠦ ᠶᠢᠨ ᠢᠯᠵᠡᠷᠡᠵᠦ ᠪᠤᠢ ᠪᠠᠶᠢᠲᠠᠯ ᠬᠢᠭᠡᠳ ᠰᠢᠨ᠎ᠡ ᠵᠠᠰᠠᠭ ᠤᠨ ᠪᠤᠲᠤᠯᠭ᠎ᠠ ᠶᠢ ᠰᠢᠭᠦᠮᠵᠢᠯᠡᠨ᠂ ᠡᠶᠢᠮᠤ ᠦᠶᠡᠰ ᠲᠤᠷ ᠪᠢᠲᠠᠨ ᠤ ᠮᠤᠩᠭᠤᠯᠴᠤᠳ ᠤᠯᠠᠨ ᠰᠢᠷᠭᠡᠭ ᠢ ᠨᠡᠶᠢᠯᠡᠭᠦᠯᠵᠦ᠂ ᠲᠦᠮᠡᠨ ᠵᠢᠩ ᠤᠨ ᠬᠦᠨᠲᠦ ᠶᠢ ᠡᠷᠭᠦᠬᠦ ᠯᠦᠭᠡ ᠠᠲᠠᠯᠢ᠂ ᠬᠦᠴᠦᠨ ᠴᠢᠲᠠᠯ ᠢᠶᠠᠨ ᠨᠢᠭᠡᠳᠭᠡᠨ ᠨᠢᠭᠡᠨ ᠵᠡᠷᠭᠡ ᠬᠦᠲᠡᠯᠤᠯᠴᠡᠬᠦ ᠦᠭᠡᠢ ᠶᠠᠮᠠᠷ ᠴᠠᠭ ᠢ ᠬᠦᠯᠢᠶᠡᠨ᠎ᠡ ᠭᠡᠮᠡᠨ ᠶᠠᠷᠢᠯᠴᠠᠵᠠᠢ᠃ ᠲᠠᠮᠳᠢᠨᠰᠦ᠋ᠷᠦᠩ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠢᠷᠡᠭᠰᠡᠨ ᠤ ᠪᠠᠨ ᠬᠤᠶᠢᠨ᠎ᠠ ᠬᠠᠨᠲᠤᠲᠤᠷᠵᠢ ᠲᠠᠢ ᠡᠶᠢᠨ ᠶᠠᠷᠢᠯᠴᠠᠭᠰᠠᠨ ᠢᠶᠠᠨ ᠲᠡᠭᠦᠨ ᠤ ᠢᠲᠡᠭᠡᠯ ᠲᠠᠢ ᠬᠦᠮᠦᠰ ᠲᠡᠭᠡᠨ ᠶᠠᠷᠢᠲᠠᠭ ᠪᠠᠶᠢᠵᠠᠢ᠃                ᠲᠡᠷᠡ ᠦᠶ᠎ᠡ ᠳᠤ ᠴᠢᠩ ᠤᠯᠤᠰ ᠤᠨ ᠲᠦᠷᠦ ᠠᠴᠠ ᠶᠠᠪᠤᠭᠤᠯᠵᠤ ᠪᠠᠶᠢᠭᠰᠠᠨ ᠰᠢᠨ᠎ᠡ ᠵᠠᠰᠠᠭ ᠤᠨ ᠪᠤᠲᠤᠯᠭ᠎ᠠ ᠭᠡᠲᠡᠭ ᠰᠢᠨᠡᠳᠬᠡᠯ  ᠨᠢ ᠲᠤᠲᠤᠭᠠᠲᠤ ᠭᠠᠲᠠᠭᠠᠲᠤ ᠮᠤᠩᠭᠤᠯ ᠲᠡᠲᠤᠢ ᠦᠭᠡᠢ ᠬᠦᠯᠦᠨ ᠪᠤᠶᠢᠷ ᠤᠨ ᠪᠠᠷᠭᠤᠴᠤᠳ ᠢ ᠰᠤᠴᠢᠭᠠᠵᠤ ᠲᠦᠢᠪᠡᠭᠡᠭᠰᠡᠨ ᠶᠤᠮ᠃ ᠬᠠᠭᠠᠨᠲᠤ ᠤᠷᠤᠰ ᠤᠯᠤᠰ ᠲᠤ ᠪᠤᠯᠵᠤ ᠪᠠᠶᠢᠭ᠎ᠠ ᠬᠤᠪᠢᠰᠬᠠᠯ ᠤᠨ ᠨᠦᠯᠦᠭᠡ ᠶᠢ ᠬᠠᠭᠠᠬᠤ ᠨᠡᠷᠡᠶᠢᠲᠦᠯ ᠢᠶᠠᠷ ᠴᠢᠩ ᠤᠯᠤᠰ ᠲᠡᠭᠦᠨ ᠤ ᠬᠢᠯᠢ ᠵᠠᠯᠭᠠᠲᠠᠭ ᠮᠤᠩᠭᠤᠯ ᠤᠯᠤᠰ ᠲᠤ ᠦᠢ ᠤᠯᠠᠨ ᠬᠢᠲᠡᠳ ᠲᠠᠷᠢᠶᠠᠴᠢᠳ ᠢ ᠲᠦᠯᠬᠢᠨ ᠤᠷᠤᠭᠤᠯᠵᠤ ᠮᠠᠯ ᠤᠨ ᠪᠡᠯᠴᠢᠭᠡᠷ ᠢ ᠬᠠᠭᠠᠯᠪᠤᠷᠢᠯᠠᠭᠤᠯᠤᠨ ᠲᠠᠷᠢᠶ᠎ᠠ ᠲᠠᠷᠢᠭᠤᠯᠵᠤ᠂ ᠲᠡᠲᠡᠨ ᠢ ᠵᠠᠬᠢᠷᠬᠤ ᠰᠢᠶᠠᠨ ︵ᠬᠤᠰᠢᠭᠤ︶ ᠢ ᠪᠠᠶᠢᠭᠤᠯᠬᠤ ᠪᠤᠯᠤᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ 1905 ᠤᠨ ᠳᠤ ᠪᠠᠷᠭᠤ ᠶᠢᠨ ᠬᠢᠯᠢ ᠶᠢᠨ ᠬᠠᠷᠠᠭᠤᠤᠯ ᠤᠳ ᠢ ᠬᠢᠲᠡᠳ ᠬᠠᠷᠠᠭᠤᠤᠯ ᠢᠶᠠᠷ ᠰᠤᠯᠢᠵᠤ᠂ 1881 ᠤᠨ ᠳᠤ ᠪᠠᠶᠢᠭᠤᠯᠤᠭᠲᠠᠭᠰᠠᠨ ᠬᠦᠯᠦᠨ ᠪᠤᠶᠢᠷ ᠤᠨ ᠰᠤᠮᠤ ᠶᠢ ᠲᠤᠪᠴᠢᠯᠠᠨ᠂ ᠬᠤᠰᠢᠭᠤ ᠶᠢ ᠵᠠᠬᠢᠷᠲᠠᠭ ᠮᠡᠶᠢᠷᠡᠨ ᠵᠠᠩᠬᠢ ᠶᠢᠨ ᠶᠠᠮᠤᠨ ᠢ ᠤᠰᠠᠳᠬᠠᠵᠤ᠂ ᠤᠷᠤᠨ ᠨᠤᠲᠤᠭ ᠤᠨ ᠵᠠᠬᠢᠷᠭᠠᠨ ᠤ ᠡᠷᠬᠡ ᠶᠢ ᠬᠡᠷᠡᠭ ᠲᠡᠭᠡᠷ᠎ᠡ ᠪᠠᠨ ᠬᠢᠲᠡᠳ ᠲᠦᠰᠢᠮᠡᠯ ᠴᠡᠷᠢᠭ ᠤᠨ ᠡᠷᠭᠡᠲᠡᠨ ᠤ ᠭᠠᠷ  ᠲᠤ ᠰᠢᠯᠵᠢᠭᠦᠯᠦᠭᠰᠡᠨ ᠠᠵᠠᠢ᠃ ᠰᠢᠨᠡᠳᠭᠡᠯ ᠢᠶᠠᠷ ᠬᠢᠭᠲᠡᠵᠦ ᠪᠠᠶᠢᠭ᠎ᠠ ᠪᠦᠬᠦ ᠵᠤᠶᠢᠯ ᠨᠢ ᠲᠡᠷᠡ ᠨᠤᠲᠤᠭ ᠤᠷᠤᠨ ᠳᠤ ᠬᠢᠲᠡᠳ ᠢᠷᠭᠡᠳ  ᠢ ᠠᠯᠢ ᠪᠤᠯᠬᠤᠷ ᠤᠯᠠᠨ ᠢ ᠤᠷᠤᠭᠤᠯᠤᠨ ᠪᠠᠷᠭᠤ ᠮᠤᠩᠭᠤᠯᠴᠤᠳ ᠢ ᠬᠦᠴᠦ ᠪᠠᠷ ᠤᠰᠠᠳᠬᠠᠬᠤ ᠳᠤ ᠴᠢᠭᠯᠡᠵᠡᠢ᠃ 1911 ᠤᠨ ᠤ ᠰᠡᠭᠦᠯᠴᠢ ᠪᠠᠷ ᠦᠨᠲᠦᠰᠦᠨ ᠤ ᠡᠷᠬᠡ ᠴᠢᠯᠦᠭᠡᠨ ᠤ ᠬᠦᠲᠡᠯᠭᠡᠭᠡᠨ ᠳᠤ ᠨᠢᠭᠡᠲᠦᠨ ᠨᠢᠬᠲᠠᠷᠠᠵᠦ ᠲᠡᠮᠵᠢᠯᠭᠡ ᠭᠤᠶᠤᠭᠰᠠᠨ ᠤ ᠲᠠᠭᠠᠤ ᠤᠷᠤᠰ ᠤᠯᠤᠰ ᠠᠴᠠ ᠠᠷᠤ ᠮᠤᠩᠭᠤᠯ ᠳᠤ ᠴᠡᠷᠢᠭ ᠵᠡᠪᠰᠡᠭ᠂ ᠶᠤᠰᠤ ᠰᠤᠷᠲᠠᠬᠤᠨ ᠤ ᠲᠠᠯ᠎ᠠ ᠪᠠᠷ ᠲᠤᠰᠠᠯᠠᠬᠤ ᠪᠤᠯᠤᠭᠰᠠᠨ ᠨᠢ ᠮᠤᠩᠭᠤᠯᠴᠤᠳ ᠤᠨ ᠲᠡᠮᠡᠴᠡᠯ ᠢ ᠶᠡᠬᠡᠲᠡ ᠵᠤᠷᠢᠬᠵᠢᠭᠤᠯᠵᠠᠢ᠂ ᠴᠢᠩ ᠤᠯᠤᠰ ᠤᠨ ᠵᠠᠬᠢᠷᠭ᠎ᠠ ᠶᠢ ᠶᠡᠭᠡ ᠬᠦᠷᠢᠶᠡᠨ ᠠᠴᠠ ᠬᠦᠭᠡᠭᠡᠨ ᠵᠠᠶᠢᠯᠠᠭᠤᠯᠵᠤ᠂ 1911 ᠤᠨ ᠤ 12 ᠰᠠᠷ᠎ᠠ ᠶᠢᠨ 29 ᠡᠲᠦᠷ ᠮᠤᠩᠭᠤᠯ ᠤᠨ ᠲᠦᠷᠦ ᠶᠢᠨ ᠲᠤᠰᠠᠭᠠᠷ ᠲᠤᠬᠲᠠᠨᠢᠯ ᠢ ᠰᠡᠷᠭᠦᠭᠡᠨ ᠲᠤᠩᠬᠠᠬᠯᠠᠵᠤ᠂ ᠤᠯᠠᠨ᠎ᠠ ᠡᠷᠭᠦᠭᠲᠡᠭᠰᠡᠨ ᠮᠤᠩᠭᠤᠯ ᠤᠯᠤᠰ ᠢ ᠪᠠᠶᠢᠭᠤᠯᠤᠨ᠂ ᠬᠠᠯᠬ᠎ᠠ ᠶᠢᠨ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠲᠡᠷᠢᠭᠦᠨ ᠵᠢᠪᠽᠦᠨᠳᠠᠮᠪᠠ ᠬᠤᠲᠤᠭᠲᠤ ᠶᠢ ᠱᠠᠰᠢᠨ ᠲᠦᠷᠦ ᠶᠢ ᠬᠤᠤᠰᠯᠠᠨ ᠪᠠᠷᠢᠬᠴᠢ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠨ ᠲᠦᠪ᠂ ᠤᠷᠤᠨ ᠨᠤᠲᠤᠭ ᠤᠨ ᠵᠠᠰᠠᠭ ᠵᠠᠬᠢᠷᠭ᠎ᠠ ᠶᠢ ᠡᠮᠬᠢᠯᠡᠨ ᠪᠠᠶᠢᠭᠤᠯᠵᠠᠢ᠃                ᠲᠠᠮᠳᠢᠨᠰᠦ᠋ᠷᠦᠩ᠂ ᠴᠢᠩ ᠤᠯᠤᠰ ᠤᠨ ᠰᠢᠨ᠎ᠡ ᠵᠠᠰᠠᠭ ᠤᠨ ᠪᠤᠲᠤᠯᠭ᠎ᠠ ᠶᠢᠨ ᠺᠤᠯᠦᠨᠢᠴᠢᠯᠠᠬᠤ ᠰᠢᠨᠵᠢ ᠴᠢᠨᠠᠷ ᠢ ᠭᠦᠨᠵᠡᠭᠡᠢ ᠤᠶᠢᠯᠠᠭᠠᠨ ᠡᠰᠡᠷᠭᠦᠴᠡᠵᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠪᠠᠷᠭᠤ ᠳᠤ ᠲᠡᠷᠡ ᠦᠶ᠎ᠡ ᠳᠤ ᠦᠷᠨᠢᠭᠰᠡᠨ ᠤᠯᠤᠰ ᠲᠦᠷᠦ ᠶᠢᠨ ᠤᠶᠢᠯᠡ ᠶᠠᠪᠤᠲᠠᠯ ᠨᠢ ᠶᠡᠭᠡ ᠬᠦᠷᠢᠶᠡᠨ ᠳᠤ ᠮᠤᠩᠭᠤᠯ ᠤᠨ ᠲᠤᠰᠠᠭᠠᠷ ᠲᠤᠬᠲᠠᠨᠢᠯ ᠢ ᠰᠡᠷᠭᠦᠭᠡᠬᠦ ᠰᠠᠨᠠᠭᠠᠴᠢᠯᠭ᠎ᠠ ᠭᠠᠷᠭᠠᠭᠰᠠᠨ ᠢ ᠪᠦᠷᠢᠨ ᠲᠡᠮᠵᠢᠵᠦ ᠪᠠᠶᠢᠯ᠎ᠠ᠃ 1911 ᠤᠨ ᠤ 9 ᠰᠠᠷ᠎ᠠ ᠳᠤ ᠪᠠᠷᠭᠤ ᠶᠢᠨ ᠨᠤᠶᠠᠳ ᠤᠨ ᠨᠢᠭᠤᠴᠠ ᠬᠤᠷᠠᠯ ᠪᠤᠯᠪᠠ᠃ ᠲᠡᠭᠦᠨ ᠢ ᠬᠦᠯᠦᠨ ᠪᠤᠶᠢᠷ ᠤᠨ ᠦᠭᠡᠯᠢᠳ  ᠤᠨ ᠪᠦᠭᠦᠲᠡ ᠶᠢᠨ ᠲᠠᠷᠤᠭ᠎ᠠ ᠱᠧᠩ ᠹᠦ᠋᠂ ᠬᠠᠭᠤᠴᠢᠨ ᠪᠠᠷᠭᠤ ᠶᠢᠨ ᠪᠦᠬᠦᠲᠡ ᠶᠢᠨ ᠲᠠᠷᠤᠭ᠎ᠠ ᠱᠧᠭᠵᠢ᠂ ᠰᠤᠯᠤᠨ ᠬᠤᠰᠢᠭᠤᠨ ᠤ ᠪᠦᠭᠦᠲᠡ ᠶᠢᠨ ᠲᠠᠷᠤᠭ᠎ᠠ ᠴᠠᠩᠲᠤ ᠨᠠᠷ ᠡᠷᠬᠢᠯᠡᠵᠦ᠂ ᠬᠦᠯᠦᠨ ︵ᠤᠲᠤ ᠶᠢᠨ ᠬᠠᠶᠢᠯᠠᠷ︶ ᠳᠤ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠤᠷᠤᠰ ᠤᠯᠤᠰ  ᠤᠨ ᠺᠦᠨᠰᠦᠯ ᠠᠴᠠ ᠲᠡᠮᠵᠢᠯᠭᠡ ᠤᠯᠵᠤ᠂ ᠮᠠᠨᠵᠤ᠂ ᠬᠢᠲᠡᠳ ᠤᠨ ᠰᠠᠯᠤᠨ ᠲᠤᠰᠭᠠᠷᠯᠠᠬᠤ ᠠᠰᠠᠭᠤᠲᠠᠯ ᠢ ᠬᠡᠯᠡᠯᠴᠡᠨ ᠵᠡᠪᠰᠡᠭᠲᠦ ᠪᠤᠰᠤᠯᠭᠠᠨ ᠳᠤ ᠪᠡᠯᠡᠳᠭᠡᠬᠦ ᠰᠡᠢᠳᠪᠤᠷᠢ ᠭᠠᠷᠭᠠᠵᠤ᠂ ᠤᠷᠤᠨ ᠨᠤᠲᠤᠭ ᠠᠴᠠ ᠮᠢᠩᠭ᠎ᠠ ᠭᠠᠷᠤᠢ ᠮᠤᠩᠭᠤᠯ ᠴᠡᠷᠢᠭ ᠡᠯᠰᠡᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠵᠤ᠂ 1912 ᠤᠨ ᠤ 1 ᠰᠠᠷ᠎ᠠ ᠶᠢᠨ 15 ᠡᠲᠦᠷ ᠵᠠᠪᠰᠡᠭᠲᠦ ᠪᠤᠰᠤᠯᠭ᠎ᠠ ᠭᠠᠷᠭᠠᠵᠤ ᠬᠦᠯᠦᠨ ︵ᠬᠠᠶᠢᠯᠠᠷ︶ ᠬᠤᠲᠠ ᠶᠢ ᠡᠵᠡᠯᠡᠵᠡᠢ᠃ ᠤᠭ ᠪᠤᠰᠤᠯᠭᠠᠨ ᠳᠤ ᠰᠢᠨ᠎ᠡ ᠪᠠᠷᠭᠤ ᠵᠡᠭᠦᠨ ᠭᠠᠷ ᠤᠨ ᠬᠦᠯᠦ ᠴᠠᠭᠠᠨ ᠬᠤᠰᠢᠭᠤᠨ ᠤ ᠭᠤᠲᠠᠭᠠᠷ ᠰᠤᠮᠤᠨ ᠤ ᠵᠠᠩᠬᠢ ᠪᠠᠶᠢᠭᠰᠠᠨ ᠲᠠᠮᠳᠢᠨᠰᠦ᠋ᠷᠦᠩ ᠢᠲᠡᠪᠬᠢᠯᠡᠨ ᠤᠷᠤᠯᠴᠠᠵᠤ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠴᠠᠭᠰᠠᠨ ᠬᠦᠮᠦᠨ ᠤ ᠨᠢᠭᠡ ᠨᠢ ᠪᠠᠶᠢᠵᠠᠢ᠃ 1912 ᠤᠨ ᠤ ᠡᠴᠦᠰ ᠢᠶᠠᠷ ᠲᠠᠮᠳᠢᠨᠰᠦ᠋ᠷᠦᠩ ᠲᠡᠷᠢᠭᠦᠲᠡᠢ ᠲᠤᠯᠤᠭᠠᠨ ᠬᠦᠮᠦᠨ ᠢ ᠶᠡᠭᠡ ᠬᠦᠷᠢᠶ᠎ᠡ ᠵᠦᠭ ᠤᠴᠢᠭᠤᠯᠵᠤ ᠮᠤᠩᠭᠤᠯ ᠤᠯᠤᠰ ᠲᠠᠢ ᠬᠠᠷᠢᠴᠠᠭ᠎ᠠ ᠠᠪᠤᠭᠤᠯᠵᠠᠢ᠃ ᠪᠠᠷᠭᠤ ᠳᠤ ᠪᠤᠯᠤᠭᠰᠠᠨ ᠡᠨᠡ ᠤᠲᠠᠭᠠᠨ ᠤ ᠵᠡᠪᠰᠡᠭᠲᠦ ᠪᠤᠰᠤᠯᠭ᠎ᠠ ᠨᠢ 1911 ᠤᠨ ᠳᠤ ᠪᠤᠯᠤᠭᠰᠠᠨ ᠴᠠᠭᠠᠭᠴᠢᠨ ᠭᠠᠭ᠋ᠠᠢ ᠵᠢᠯ ᠤᠨ ᠦᠨᠲᠦᠰᠦᠲᠡᠨ ᠤ ᠡᠷᠭᠡ ᠴᠢᠯᠦᠭᠡ ᠶᠢ ᠲᠡᠮᠡᠴᠡᠨ ᠤᠯᠬᠤ ᠪᠠᠷ ᠶᠠᠪᠤᠭᠲᠠᠭᠰᠠᠨ ᠴᠢᠩ ᠤᠯᠤᠰ ᠤᠨ ᠨᠤᠶᠠᠷᠬᠠᠯ ᠢ ᠲᠦᠯᠬᠢᠨ ᠤᠨᠠᠭᠠᠬᠤ ᠭᠡᠰᠡᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯ ᠤᠨ ᠨᠦᠯᠦᠭᠡ ᠠᠴᠠ ᠰᠠᠯᠤᠰᠢ ᠦᠭᠡᠢ ᠶᠤᠮ᠃                ᠬᠦᠯᠦᠨ ᠪᠤᠶᠢᠷ ᠤᠨ ᠠᠷᠠᠳ ᠲᠦᠮᠡᠨ ᠢ ᠲᠦᠯᠦᠭᠡᠯᠡᠨ ᠲᠤᠰᠠᠭᠠᠷ ᠲᠤᠭᠲᠠᠨᠢᠭᠰᠠᠨ ᠮᠤᠩᠭᠤᠯ ᠤᠨ ᠲᠦᠷᠦ ᠳᠤ ᠵᠢᠳᠬᠦᠬᠦ ᠪᠠᠷ ᠤᠴᠢᠭᠰᠠᠨ ᠲᠦᠯᠦᠭᠡᠯᠡᠭᠴᠢᠳ ᠢ ᠮᠤᠩᠭᠤᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠬᠠᠯᠠᠭᠤᠨ ᠢᠶᠠᠷ ᠬᠦᠯᠢᠶᠡᠨ ᠠᠪᠴᠦ ᠲᠠᠮᠳᠢᠨᠰᠦ᠋ᠷᠦᠩ ᠢ ᠭᠠᠲᠠᠭᠠᠲᠤ ᠬᠡᠷᠡᠭ ᠢ ᠪᠦᠬᠦᠲᠡ ᠡᠷᠬᠢᠯᠡᠨ ᠰᠡᠢᠳᠬᠡᠭᠴᠢ ᠶᠠᠮᠤᠨ ᠤ ᠲᠡᠳ᠋ ᠰᠠᠶᠢᠳ ᠢᠶᠠᠷ ᠲᠤᠮᠢᠯᠠᠭᠰᠠᠨ ᠪᠠ ᠪᠤᠰᠤᠳ ᠨᠦᠭᠦᠳ ᠢ ᠨᠢ ᠪᠠᠰᠠ ᠬᠦᠬᠢᠭᠦᠯᠦᠨ ᠱᠠᠩᠨᠠᠵᠠᠢ᠃ ᠲᠠᠮᠳᠢᠨᠰᠦ᠋ᠷᠦᠩ ᠤᠨ ᠬᠠᠭᠤᠴᠢᠨ ᠲᠠᠨᠢᠯ ᠶᠡᠭᠡ ᠬᠦᠷᠢᠶᠡᠨ ᠳᠤ ᠴᠢᠩ ᠤᠯᠤᠰ ᠤᠨ ᠵᠠᠬᠢᠷᠭᠠᠨ ᠤ ᠡᠰᠡᠷᠭᠦ ᠬᠤᠪᠢᠰᠬᠠᠯᠲᠤ ᠡᠷᠬᠢᠯᠲᠡ ᠶᠢ ᠭᠤᠤᠯᠯᠠᠨ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠭᠴᠢ ᠴᠢᠨ ᠸᠠᠩ ᠬᠠᠨᠲᠤᠲᠤᠷᠵᠢ ᠲᠤᠰ ᠭᠠᠲᠠᠭᠠᠲᠤ ᠬᠡᠷᠡᠭ ᠢ ᠪᠦᠬᠦᠲᠡ ᠡᠷᠬᠢᠯᠡᠨ ᠰᠡᠢᠳᠬᠡᠭᠴᠢ ᠶᠠᠮᠤᠨ ᠤ ᠲᠡᠷᠢᠭᠦᠨ ᠰᠠᠶᠢᠳ ᠢᠶᠠᠷ ᠲᠤᠮᠢᠯᠠᠭᠲᠠᠨ ᠠᠵᠢᠯᠯᠠᠵᠤ ᠪᠠᠶᠢᠵᠠᠢ᠃ ᠭᠤᠷᠪᠠᠨ ᠵᠢᠯ ᠤᠨ ᠡᠮᠤᠨ᠎ᠡ ᠴᠢᠩ ᠤᠯᠤᠰ ᠤᠨ ᠨᠡᠶᠢᠰᠯᠠᠯ ᠳᠤ ᠲᠠᠨᠢᠯᠴᠠᠵᠤ ᠮᠤᠩᠭᠤᠯ ᠤᠨ ᠲᠦᠷᠦ ᠶᠢ ᠰᠡᠷᠭᠦᠭᠡᠨ ᠮᠠᠨᠲᠤᠭᠤᠯᠬᠤ ᠶᠡᠭᠡ ᠬᠡᠷᠡᠭ ᠲᠤ ᠬᠦᠴᠦ  ᠪᠠᠨ ᠨᠢᠭᠡᠳᠭᠡᠨ ᠬᠦᠲᠡᠯᠬᠦ ᠪᠠᠷ ᠲᠤᠬᠢᠷᠠᠯᠴᠠᠵᠤ ᠲᠤᠰ ᠲᠤᠰ ᠤᠨ ᠨᠤᠲᠤᠭ ᠲᠤ ᠶᠡᠭᠡ ᠭᠡᠷᠡᠭ ᠢ ᠤᠲᠤᠷᠢᠲᠤᠨ ᠡᠬᠢᠯᠡᠭᠦᠯᠦᠭᠰᠡᠨ ᠦᠨᠲᠦᠰᠦᠲᠡᠨ ᠤ ᠡᠷᠬᠡ ᠴᠢᠯᠦᠭᠡᠨ ᠤ ᠲᠦᠯᠦᠭᠡ ᠲᠡᠮᠴᠡᠭᠴᠢᠳ ᠡᠶᠢᠨᠬᠦ ᠪᠤᠲᠠᠲᠤ ᠤᠶᠢᠯᠠ ᠠᠵᠢᠯᠯᠠᠭᠠᠨ ᠤ ᠲᠠᠯᠠᠪᠤᠷ ᠲᠤ ᠬᠠᠮᠲᠤᠷᠠᠨ ᠵᠢᠳᠬᠦᠬᠦ ᠪᠤᠯᠤᠭᠰᠠᠨ ᠠᠵᠢ᠃                ᠴᠢᠩ ᠤᠯᠤᠰ ᠠᠴᠠ ᠤᠯᠢᠶᠠᠰᠤᠲᠠᠢ ᠳᠤ ᠰᠠᠭᠤᠭ᠎ᠠ ᠵᠠᠩᠵᠤᠨ ᠭᠦᠢ ᠹᠠᠩ ᠲᠡᠷᠢᠭᠦᠲᠡᠢ ᠡᠷᠬᠡ ᠪᠠᠷᠢᠭᠴᠢᠳ ᠮᠤᠩᠭᠤᠯ ᠤᠯᠤᠰ  ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠱᠠᠭᠠᠷᠲᠠᠯᠭ᠎ᠠ ᠪᠠᠷ ᠡᠰᠡᠷᠭᠦᠴᠡᠯ ᠦᠭᠡᠢ ᠡᠷᠭᠡ ᠲᠤᠰᠢᠶᠠᠯ ᠠᠴᠠ ᠪᠠᠨ 1912 ᠤᠨ ᠤ ᠡᠬᠢ ᠪᠠᠷ ᠤᠭᠴᠠᠷᠠᠭᠰᠠᠨ ᠲᠤᠯᠠ ᠤᠯᠢᠶᠠᠰᠤᠲᠠᠢ ᠬᠤᠲᠠ ᠲᠠᠶᠢᠪᠤᠩ ᠵᠠᠮ ᠢᠶᠠᠷ ᠴᠢᠯᠦᠭᠡᠯᠡᠭᠲᠡᠵᠡᠢ᠃ ᠭᠡᠲᠡᠯ᠎ᠠ ᠬᠤᠪᠲᠤ ᠶᠢᠨ ᠠᠮᠪᠠᠨ ᠮᠤᠩᠭᠤᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠤᠨ ᠱᠠᠭᠠᠷᠲᠠᠯᠭ᠎ᠠ ᠶᠢ ᠬᠦᠯᠢᠶᠡᠵᠦ ᠠᠪᠤᠭ᠎ᠠ ᠦᠭᠡᠢ ᠪᠠᠷ ᠪᠠᠷᠠᠬᠤ ᠦᠭᠡᠢ ᠲᠦᠷᠦ ᠶᠢᠨ ᠡᠯᠴᠢ ᠶᠢ ᠪᠠᠷᠢᠪᠴᠢᠯᠠᠵᠤ ᠬᠤᠷᠤᠭᠠᠭᠰᠠᠨ ᠲᠤᠯᠠ ᠨᠡᠶᠢᠰᠯᠠᠯ ᠠᠴᠠ ᠴᠢᠯᠦᠭᠡᠯᠡᠬᠦ ᠴᠡᠷᠢᠭ ᠶᠠᠭᠠᠷᠠᠯᠲᠠᠢ ᠬᠦᠲᠡᠯᠭᠡᠬᠦ ᠪᠤᠯᠪᠠ᠂ ᠲᠡᠭᠡᠭᠡᠳ ᠵᠠᠷᠯᠢᠭ ᠢᠶᠠᠷ ᠭᠠᠲᠠᠭᠠᠲᠤ ᠶᠠᠮᠤᠨ ᠤ ᠲᠡᠳ᠋ ᠰᠠᠶᠢᠳ ᠪᠠᠷᠭᠤ ᠶᠢᠨ ᠭᠦᠩ ᠵ᠊᠂ ᠲᠠᠮᠳᠢᠨᠰᠦ᠋ᠷᠦᠩ᠂ ᠲᠤᠲᠤᠭᠠᠲᠤ ᠶᠠᠮᠤᠨ ᠤ ᠲᠡᠳ᠋ ᠲᠦᠰᠢᠮᠡᠯ ᠬᠦᠩ ᠰ᠊᠂ ᠮᠠᠬᠰᠤᠷᠵᠠᠪ ︵1878—1927︶ ᠨᠠᠷ ᠢ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠢ ᠲᠦᠪᠰᠢᠳᠭᠡᠨ ᠲᠤᠭᠲᠠᠭᠠᠬᠤ ᠰᠠᠶᠢᠳ ᠢᠶᠠᠷ᠂ ᠵᠠᠯᠠᠬᠠᠨᠽᠠ ᠬᠤᠲᠤᠭᠲᠤ ᠲᠠᠮᠳᠢᠨᠪᠠᠽᠠᠷ᠂ ᠵᠤᠷᠢᠬᠲᠤ ᠸᠠᠩ ᠨᠠᠸᠠᠩᠴᠡᠷᠡᠩ ᠨᠠᠷ ᠢ ᠢᠯᠪᠢᠨ ᠲᠤᠬᠤᠨᠢᠭᠤᠯᠬᠤ ᠰᠠᠶᠢᠳ ᠢᠶᠠᠷ ᠲᠤᠲᠤᠭᠠᠲᠤ ᠶᠠᠮᠤᠨ ᠤ ᠲᠡᠳ᠋ ᠲᠦᠰᠢᠮᠡᠯ ᠬᠠᠷᠠᠴᠢᠨ ᠬᠦᠩ ᠬᠠᠶᠢᠰᠠᠩ ᠢ ᠵᠦᠪᠯᠡᠨ ᠲᠤᠰᠠᠯᠠᠬᠤ ᠰᠠᠶᠢᠳ ᠢᠶᠠᠷ ᠲᠤᠰ ᠲᠤᠰ ᠲᠤᠮᠢᠯᠠᠵᠤ ᠬᠦᠲᠡᠯᠭᠡᠪᠡ᠃ ᠲᠡᠭᠡᠬᠦ  ᠳᠤ ᠰᠠᠶᠢᠳ ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠨᠠᠷ ᠬᠤᠵᠢᠷᠪᠤᠯᠤᠩ ᠤᠨ ᠴᠡᠷᠢᠭ ᠠᠴᠠ ᠲᠤᠰᠪᠤᠷᠢ ᠬᠤᠷᠢᠨ ᠲᠠᠪᠤᠨ ᠴᠡᠷᠢᠭ ᠢ ᠲᠠᠭᠠᠯᠲᠤᠭᠤᠯᠤᠨ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠶᠢᠨ ᠨᠠᠢᠮᠠᠨ ᠪᠤᠶᠤ ᠲᠠᠪᠤᠲᠤᠭᠠᠷ ᠰᠠᠷ᠎ᠠ ᠶᠢᠨ 24 ᠡᠲᠦᠷ ᠬᠤᠪᠲᠤ ᠶᠢᠨ ᠵᠦᠭ ᠲᠠᠶᠢᠯᠠᠷ᠎ᠠ ᠮᠤᠷᠲᠠᠵᠠᠢ᠃ ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠨᠠᠷ ᠤᠨ ᠤᠲᠤᠷᠢᠲᠤᠭᠰᠠᠨ ᠴᠡᠷᠢᠭ ᠬᠤᠪᠲᠤ ᠳᠤ ᠲᠤᠯᠵᠤ ᠤᠴᠢᠭᠠᠳ ᠪᠠᠶᠢᠲᠠᠯ ᠢ ᠲᠠᠩᠨᠠᠨ ᠲᠤᠷᠰᠢᠵᠦ ᠬᠤᠲᠠ ᠶᠢ ᠬᠡᠷᠬᠢᠨ ᠴᠢᠯᠦᠭᠡᠯᠡᠬᠦ ᠲᠦᠯᠦᠪᠯᠡᠭᠡ ᠪᠤᠯᠪᠠᠰᠤᠷᠠᠭᠤᠯᠬᠤ ᠳᠠᠭᠠᠨ ᠶᠠᠭᠤᠨ ᠤ ᠤᠷᠢᠳ ᠬᠤᠲᠠ ᠶᠢ ᠪᠦᠰᠡᠯᠡᠬᠦ᠂ ᠭᠠᠲᠠᠭᠰᠢ ᠪᠠᠨ ᠬᠠᠷᠢᠴᠠᠭᠤᠯᠬᠤ ᠦᠭᠡᠢ ᠪᠤᠯᠭᠠᠬᠤ ᠶᠢ ᠤᠷᠢᠲᠠᠯ ᠪᠤᠯᠭᠠᠵᠠᠢ᠃ ᠴᠤᠶᠢᠪᠠᠯᠰᠠᠩ ᠡᠨᠡ ᠤᠶᠢᠯᠡ ᠶᠠᠪᠤᠲᠠᠯ ᠤᠨ ᠲᠤᠬᠠᠢ ᠪᠢᠴᠢᠬᠦ ᠳᠡᠭᠡᠨ《 ᠲᠠᠮᠳᠢᠨᠰᠦ᠋ᠷᠦᠩ ᠠᠴᠠ ᠪᠢᠲᠡᠨ ᠤ ᠴᠡᠷᠢᠭ ᠴᠦᠭᠡᠨ ᠬᠦᠴᠦᠨ ᠪᠠᠭᠤᠷᠠᠢ᠂ ᠬᠤᠪᠲᠤ ᠶᠢᠨ ᠲᠠᠶᠢᠰᠤᠨ ᠤ ᠴᠡᠷᠢᠭ ᠤᠯᠠᠨ᠂ ᠵᠠᠷ ᠵᠡᠪᠰᠡᠭ ᠦᠯᠡᠮᠵᠢ ᠲᠤᠯᠠ ᠪᠢᠲᠡ ᠬᠦᠩᠭᠡᠨ ᠢᠶᠠᠷ ᠬᠦᠲᠡᠯᠵᠦ ᠪᠤᠯᠬᠤ ᠦᠭᠡᠢ᠂ ᠬᠡᠷᠪᠡ ᠪᠤᠯᠭᠤᠮᠵᠢ ᠦᠭᠡᠢ ᠪᠠᠷ ᠬᠦᠲᠡᠯᠦᠭᠡᠳ ᠬᠡᠷᠡᠭ ᠮᠠᠭᠤ ᠪᠤᠯᠪᠠᠯ ᠪᠢᠲᠡᠨ ᠤ ᠨᠡᠷ᠎ᠡ ᠲᠦᠷᠦ ᠪᠠᠭᠤᠷᠠᠨ᠎ᠠ ᠭᠡᠵᠦ ᠪᠤᠯᠭᠤᠮᠵᠢᠯᠠᠭᠤᠯᠤᠨ ᠠᠩᠬᠠᠷᠤᠭᠤᠯᠬᠤ ᠳᠤ ᠮᠠᠬᠰᠤᠷᠵᠠᠪ ᠵᠦᠪᠰᠢᠶᠡᠷᠡᠵᠦ ᠬᠤᠪᠲᠤ ᠠᠴᠠ ᠭᠠᠷᠴᠦ ᠢᠷᠡᠭᠰᠡᠨ ᠰᠡᠵᠢᠭ ᠪᠦᠬᠦᠢ ᠨᠠᠢᠮᠠᠨ ᠡᠲᠡᠭᠡᠳ ᠢ ᠮᠠᠬᠰᠤᠷᠵᠠᠪ ᠡᠬᠢᠯᠡᠨ ᠫᠤᠤᠲᠠᠭᠰᠠᠨ ᠪᠦᠭᠡᠳ ᠪᠠᠷᠢᠪᠴᠢᠯᠠᠭᠲᠠᠭᠰᠠᠨ ᠬᠦᠮᠦᠰ ᠦᠴᠢᠬᠦ ᠳᠡᠭᠡᠨ᠄《 ᠮᠤᠩᠭᠤᠯ ᠴᠡᠷᠢᠭ ᠤᠳ ᠪᠠ ᠬᠦᠩ ᠮᠠᠬᠰᠤᠷᠵᠠᠪ᠂ ᠲᠠᠮᠳᠢᠨᠰᠦ᠋ᠷᠦᠩ ᠲᠡᠷᠢᠭᠦᠲᠡᠢ ᠵᠠᠬ᠎ᠠ ᠪᠤᠯᠠᠭ ᠤᠨ ᠦᠷᠲᠡᠭᠡᠨ ᠤ ᠤᠶᠢᠷ᠎ᠡ᠂ ᠬᠦᠴᠦ ᠪᠠᠭ᠎ᠠ ᠴᠦᠭᠡᠨ ᠴᠡᠷᠢᠭ ᠲᠠᠢ ᠢᠷᠡᠵᠦ ᠰᠢᠪᠡᠭᠡᠯᠡᠨ ᠪᠠᠶᠢᠭ᠎ᠠ ᠭᠡᠭᠴᠢ ᠶᠢ ᠮᠠᠨ ᠤ ᠰᠠᠶᠢᠳ ᠤᠳ ᠰᠤᠨᠤᠰᠴᠦ ᠡᠰᠡᠷᠭᠦᠴᠡᠨ ᠪᠠᠶᠢᠯᠲᠤᠬᠤ ᠬᠦᠴᠦᠨ ᠢ ᠵᠤᠵᠠᠭᠠᠳᠬᠠᠵᠤ᠂ ᠵᠦᠭ ᠪᠦᠷᠢ ᠳᠤ ᠬᠠᠷᠠᠭᠤᠤᠯ ᠲᠠᠩᠨᠠᠭᠤᠤᠯ ᠭᠠᠷᠭᠠᠵᠤ ᠬᠠᠷᠠᠭᠠᠯᠵᠠᠭᠤᠯᠤᠨ ᠤᠲᠠᠬᠤ ᠦᠭᠡᠢ ᠶᠡᠭᠡ ᠴᠡᠷᠢᠭ ᠭᠠᠷᠴᠦ ᠵᠠᠬ᠎ᠠ ᠪᠤᠯᠠᠭ ᠤᠨ ᠭᠠᠵᠠᠷ ᠲᠠᠶᠢᠯᠡᠷ᠎ᠡ ᠤᠴᠢᠵᠦ ᠰᠦᠨᠦᠭᠡᠬᠦ ᠪᠠᠷ ᠪᠡᠯᠡᠳᠭᠡᠨ ᠪᠠᠶᠢᠭᠰᠠᠨ ᠭᠡᠵᠦ ᠴᠢᠬᠤᠯᠠ ᠮᠡᠲᠡᠭᠡ ᠦᠭᠬᠦᠭᠰᠡᠨ ᠰᠢᠨ᠎ᠡ ᠬᠢᠵᠠᠭᠠᠷ ︵ᠰᠢᠨᠵᠢᠶᠠᠩ︶ ᠤᠨ ᠵᠦᠭ  ᠠᠴᠠ ᠢᠷᠡᠭᠰᠡᠨ ᠲᠤᠰᠠᠯᠠᠬᠤ ᠬᠦᠴᠦᠨ ᠢ ᠴᠠᠭ ᠲᠤᠬᠠᠢ ᠳᠤ ᠨᠢ ᠤᠬᠲᠤᠵᠦ ᠪᠤᠲᠠ ᠴᠤᠬᠢᠭᠠᠳ᠂ ᠮᠠᠨᠵᠤ ᠠᠮᠪᠠᠨ᠂ ᠬᠢᠲᠡᠳ ᠲᠦᠰᠢᠮᠡᠯ ᠵᠡᠷᠭᠡ ᠠᠯᠪᠠᠨ ᠤ ᠬᠦᠮᠦᠰ ᠢ ᠬᠤᠲᠠ ᠠᠴᠠ ᠭᠠᠷᠬᠤ ᠪᠤᠯᠤᠯᠴᠠᠭ᠎ᠠ ᠦᠭᠡᠢ ᠪᠤᠯᠭᠠᠵᠤ ᠪᠠᠶᠢᠭᠠᠳ ᠲᠠᠭᠠᠷᠢᠵᠦ ᠴᠤᠬᠢᠬᠤ ᠳᠤ ᠪᠡᠯᠡᠳᠬᠡᠵᠦ ᠪᠠᠶᠢᠪᠠ᠃ ᠬᠤᠪᠲᠤ ᠶᠢᠨ ᠮᠠᠶᠢᠮᠠᠢ ᠬᠤᠲᠠ᠂ ᠰᠠᠩ ᠤᠨ ᠬᠤᠲᠠ ᠶᠢ ᠲᠠᠭᠠᠷᠢᠨ ᠡᠵᠡᠯᠡᠬᠦ ᠠᠵᠢᠯᠯᠠᠭ᠎ᠠ ᠶᠢ ᠰᠠᠶᠢᠳ ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠨᠠᠷ ᠰᠠᠶᠢᠭᠤᠳ ᠤᠲᠤᠷᠢᠳᠴᠦ ᠦᠪᠡᠷᠰᠡᠳ ᠢᠶᠠᠨ ᠲᠤᠯᠤᠯᠲᠤᠭᠠᠨ ᠳᠤ ᠪᠡᠶᠡᠴᠢᠯᠡᠨ ᠤᠷᠤᠯᠴᠠᠵᠦ 1912 ᠤᠨ ᠤ 8 ᠰᠠᠷ᠎ᠠ ᠶᠢᠨ 5—7 ᠡᠲᠦᠷ ᠤᠳ ᠲᠤ ᠰᠢᠷᠦᠬᠦᠨ ᠲᠤᠯᠤᠯᠲᠤᠭᠠᠨ ᠪᠤᠯᠵᠤ ᠮᠠᠨᠵᠤ ᠬᠢᠲᠡᠳ ᠤᠳ ᠢ ᠪᠠᠭᠤᠯᠭᠠᠵᠤ ᠠᠪᠤᠭᠰᠠ ᠶᠤᠮ》 ᠭᠡᠵᠡᠢ᠃ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠢ ᠢᠯᠪᠢᠨ ᠲᠤᠬᠤᠨᠢᠭᠤᠯᠬᠤ ᠰᠠᠶᠢᠳ ᠵᠠᠯᠠᠬᠠᠨᠽᠠ ᠬᠤᠲᠤᠭᠲᠤ ᠲᠠᠮᠳᠢᠨᠪᠠᠽᠠᠷ᠂ ᠵᠤᠷᠢᠬᠲᠤ ᠸᠠᠩ ᠨᠠᠸᠠᠩᠴᠡᠷᠡᠩ ᠨᠠᠷ 1912 ᠤᠨ ᠤ 8 ᠰᠠᠷ᠎ᠠ ᠶᠢᠨ 27 ᠡᠲᠦᠷ ᠮᠤᠩᠭᠤᠯ ᠤᠯᠤᠰ ᠤᠨ ᠬᠠᠭᠠᠨ ᠳᠤ ᠠᠶᠢᠯᠠᠳᠬᠠᠬᠤ ᠳᠠᠭᠠᠨ᠄《 ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠪᠤᠯᠪᠠᠰᠤ ᠬᠦᠴᠦᠷᠭᠡᠭ ᠴᠡᠷᠢᠭ ᠢ ᠭᠠᠷᠭᠠᠵᠤ ᠬᠤᠲᠠ ᠶᠢ ᠪᠠᠬᠢᠯᠡᠨ ᠪᠠᠲᠤᠯᠠᠭᠰᠠᠨ ᠬᠤᠪᠲᠤ ᠬᠤᠲᠠ ᠶᠢᠨ ᠮᠠᠨᠵᠤ᠂ ᠬᠢᠲᠡᠳ ᠨᠠᠷ ᠠᠴᠠ ᠡᠭᠡᠨᠡᠭᠲᠡ ᠪᠡᠷᠬᠡᠰᠢᠶᠡᠭᠰᠡᠨ ᠦᠭᠡᠢ᠂ ᠤᠯᠠᠮ ᠤᠯᠠᠮ ᠢᠶᠠᠷ ᠰᠠᠨᠠᠯ ᠰᠡᠳᠬᠢᠯ ᠰᠢᠯᠤᠭᠤᠳᠴᠦ᠂ ᠴᠡᠷᠢᠭ ᠠᠩᠬᠢ ᠶᠢ ᠲᠠᠷᠠᠭ᠎ᠠ ᠲᠠᠷᠠᠭᠠᠪᠠᠷ ᠲᠠᠭᠠᠯᠲᠤᠭᠤᠯᠵᠤ ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠨᠠᠷ ᠪᠡᠶᠡᠰ ᠢᠶᠠᠷ ᠭᠠᠪᠰᠢᠭᠠᠶᠢᠯᠠᠨ ᠮᠤᠷᠲᠠᠵᠤ᠂ ᠪᠠᠶᠢᠯᠲᠤᠬᠤ ᠬᠡᠷᠡᠭ ᠲᠤᠲᠤᠮ ᠳᠤ ᠤᠬᠲᠤᠬᠠᠨ ᠴᠦ ᠤᠬᠤᠰᠬᠢᠨ ᠵᠠᠶᠢᠯᠠᠭᠰᠠᠨ ᠦᠭᠡᠢ ᠪᠠᠶᠢᠲᠤᠭᠠᠢ ᠢᠯᠠᠩᠭᠤᠶ᠎ᠠ ᠲᠠᠮᠳᠢᠨᠰᠦ᠋ᠷᠦᠩ ᠪᠤᠯᠪᠠᠰᠤ ᠠᠮᠢ ᠪᠡᠶ᠎ᠡ ᠶᠢ ᠦᠴᠦᠬᠡᠨ ᠴᠦ ᠬᠠᠶᠢᠷᠠᠯᠠᠬᠤ ᠦᠭᠡᠢ ᠦᠨᠡᠨᠬᠦ ᠰᠠᠨᠠᠭ᠎ᠠ ᠪᠠᠷ ᠲᠦᠷᠦᠭᠦᠯᠦᠨ ᠵᠢᠳᠭᠦᠨ ᠶᠠᠪᠤᠵᠤ ᠲᠠᠶᠢᠨ ᠳᠤ ᠲᠤᠯᠤᠯᠲᠤᠵᠤ ᠪᠠᠶᠢᠯᠲᠤᠬᠤ ᠳᠤ ᠴᠦᠮ ᠪᠠᠭᠠᠲᠤᠷᠯᠠᠨ ᠤᠷᠤᠵᠤ ᠬᠢᠲᠤᠯᠲᠤᠬᠤ ᠪᠠ ᠮᠠᠨᠵᠤ᠂ ᠬᠢᠲᠡᠳ ᠤᠳ ᠢ ᠡᠯᠰᠡᠵᠦ ᠲᠤᠬᠤᠨᠢᠭᠤᠯᠬᠤ  ᠳᠤ ᠮᠡᠷᠭᠡᠨ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠵᠦ᠂ ᠮᠥᠨ ᠠᠶᠢᠯ ᠤᠯᠤᠰ ︵ᠤᠷᠣᠰ ᠤᠯᠤᠰ ᠢ ᠬᠡᠯᠡᠵᠦ ᠪᠤᠢ︶ ᠤᠨ ᠺᠦᠨᠰᠦᠯ ᠰᠠᠶᠢᠳ ᠪᠠ ᠪᠤᠭᠤᠯᠴᠤᠳ ︵ᠦᠪᠡᠷᠰᠡᠳ ᠢ ᠪᠠᠨ ᠬᠡᠯᠡᠵᠦ ᠪᠤᠢ︶ ᠤᠨ ᠬᠠᠮᠲᠤ ᠵᠦᠪᠯᠡᠯᠲᠤᠨ ᠵᠦᠢ ᠵᠤᠬᠢᠰ ᠲᠠᠢ ᠪᠠᠷ ᠰᠡᠢᠳᠬᠡᠨ ᠠᠪᠠᠴᠢᠭᠰᠠᠨ ᠵᠡᠷᠭᠡ ᠬᠡᠷᠡᠭ ᠤᠨ ᠪᠠᠶᠢᠲᠠᠯ ᠲᠦᠷᠰᠦ ᠶᠢ ᠦᠵᠡᠪᠡᠰᠦ ᠲᠡᠲᠡ ᠰᠠᠶᠢᠳ ᠤᠳ ᠪᠤᠯᠪᠠᠰᠤ ᠦᠨᠡᠬᠡᠷ ᠦᠨᠡᠨ ᠬᠦᠴᠦ ᠶᠢ ᠲᠠᠭᠠᠤᠰᠬᠠᠵᠤ ᠵᠢᠳᠬᠦᠬᠦ ᠶᠢ ᠡᠷᠬᠢᠮᠯᠡᠭᠰᠡᠨ ᠪᠠᠭᠠᠲᠤᠷ ᠬᠦᠴᠦᠨ᠂ ᠮᠡᠷᠭᠡᠨ ᠪᠤᠯᠲᠤᠭ᠎ᠠ ᠪᠦᠬᠦᠢ ᠴᠤᠬᠤᠮ ᠬᠡᠷᠡᠭᠯᠡᠪᠡᠰᠦ ᠵᠤᠬᠢᠬᠤ ᠲᠦᠰᠢᠮᠡᠯ ᠨᠠᠷ ᠲᠠᠷᠤᠢ ᠮᠥᠨ 》ᠭᠡᠵᠦ ᠲᠠᠮᠳᠢᠨᠰᠦ᠋ᠷᠦᠩ᠂ ᠮᠠᠬᠰᠤᠷᠵᠠᠪ ᠨᠠᠷ ᠤᠨ ᠡᠷᠡᠯᠭᠡᠭ ᠵᠤᠷᠢᠭ ᠰᠠᠮᠪᠠᠭ᠎ᠠ ᠲᠠᠢ᠂ ᠬᠦᠴᠦᠯᠡᠨ ᠲᠤᠯᠤᠯᠲᠤᠲᠠᠭ ᠠᠴᠠ ᠭᠠᠲᠠᠨ᠎ᠠ ᠲᠠᠮᠳᠢᠨᠰᠦ᠋ᠷᠦᠩ ᠡᠩ ᠤᠨ ᠮᠠᠨᠵᠤ ᠬᠢᠲᠡᠳ ᠢᠷᠭᠡᠳ ᠢ ᠲᠠᠲᠠᠵᠤ ᠲᠤᠬᠤᠨᠢᠭᠤᠯᠬᠤ ᠠᠯᠢ ᠵᠤᠬᠢᠰᠲᠠᠢ ᠠᠷᠭ᠎ᠠ ᠶᠢ ᠬᠡᠷᠡᠭᠯᠡᠵᠦ ᠪᠠᠶᠢᠭᠰᠠᠨ ᠲᠡᠲᠦᠢ ᠦᠭᠡᠢ ᠤᠷᠤᠰ ᠤᠯᠤᠰ ᠠᠴᠠ ᠬᠤᠪᠲᠤ ᠳᠤ ᠰᠠᠭᠤᠭ᠎ᠠ ᠺᠦᠨᠰᠦᠯ ᠺᠦᠽᠡᠮᠢᠨᠰᠺᠡᠢ ᠲᠠᠢ ᠵᠤᠬᠢᠰᠲᠠᠢ ᠬᠠᠷᠢᠯᠴᠠᠵᠤ ᠪᠠᠶᠢᠭᠰᠠᠨ ᠢ ᠦᠭᠦᠯᠡᠭᠰᠡᠨ ᠪᠠᠶᠢᠵᠠᠢ᠃ ᠡᠨᠡ ᠨᠢ ᠲᠠᠮᠳᠢᠨᠰᠦ᠋ᠷᠦᠩ ᠤᠨ ᠮᠠᠨᠵᠤ ᠶᠢᠨ ᠡᠷᠬᠡ ᠪᠠᠷᠢᠭᠴᠢᠳ ᠪᠤᠯᠤᠨ ᠬᠢᠲᠡᠳ ᠲᠦᠰᠢᠮᠡᠯ ᠨᠠᠷ ᠢ ᠮᠠᠨᠵᠤ᠂ ᠬᠢᠲᠡᠳ ᠤᠨ ᠠᠷᠠᠳ ᠲᠦᠮᠡᠨ ᠠᠴᠠ ᠢᠯᠭᠠᠭ᠎ᠠ ᠲᠠᠢ ᠬᠠᠨᠲᠤᠵᠤ᠂ ᠠᠯᠢ ᠴᠦ ᠦᠨᠲᠦᠰᠦᠲᠡᠨ᠂ ᠶᠠᠰᠤᠲᠠᠨ ᠤ ᠠᠷᠠᠳ ᠲᠦᠮᠡᠨ ᠪᠤᠯ ᠬᠦᠬᠡᠷᠤᠬᠡᠶᠢᠯᠡᠯᠲᠡᠢ ᠭᠡᠵᠦ ᠦᠵᠡᠵᠦ ᠪᠠᠶᠢᠭᠰᠠᠨ ᠨᠢᠭᠦᠯᠰᠡᠩᠬᠦᠢ ᠰᠡᠳᠬᠢᠯ ᠤᠨ ᠬᠢᠨᠢ ᠢᠯᠡᠷᠡᠯ ᠪᠤᠯᠤᠨ᠎ᠠ᠃ ᠬᠤᠪᠲᠤ ᠶᠢᠨ ᠠᠮᠪᠠᠨ ᠪᠤᠤ ᠵᠢᠶᠦ᠋ᠨ ᠪᠤᠯᠤᠨ ᠪᠤᠰᠤᠳ ᠬᠦᠮᠦᠰ ᠢ ᠤᠷᠤᠰ ᠤᠨ ᠨᠤᠲᠤᠭ ᠢᠶᠠᠷ ᠪᠤᠴᠠᠭᠠᠬᠤ ᠶᠢᠨ ᠲᠤᠯᠠ ᠡᠭᠦᠨ ᠠᠴᠠ ᠬᠡᠲᠦᠨ ᠬᠤᠨᠤᠭ  ᠤᠨ ᠲᠠᠷᠠᠭ᠎ᠠ ᠤᠷᠤᠰ ᠤᠨ ᠬᠢᠯᠢ ᠬᠦᠷᠲᠡᠯ᠎ᠡ ᠮᠤᠩᠭᠤᠯ ᠴᠡᠷᠢᠭ ᠢᠶᠠᠷ ᠬᠠᠮᠠᠭᠠᠯᠠᠭᠤᠯᠵᠤ᠂ ᠮᠤᠷᠢ ᠲᠡᠮᠡᠭᠡ ᠵᠡᠷᠭᠡ ᠤᠨᠤᠯᠭ᠎ᠠ ᠠᠴᠢᠯᠠᠭ᠎ᠠ ᠦᠭᠬᠦ ᠲᠤᠬᠠᠢ ᠮᠤᠩᠭᠤᠯ ᠴᠡᠷᠢᠭ ᠤᠨ ᠵᠠᠬᠢᠷᠤᠭᠴᠢ ᠵᠠᠩᠵᠤᠨ ᠲᠠᠮᠳᠢᠨᠰᠦ᠋ᠷᠦᠩ᠂ ᠬᠠᠭᠠᠨᠲᠤ ᠤᠷᠤᠰ ᠠᠴᠠ ᠬᠤᠪᠲᠤ ᠰᠢᠷ᠎ᠠ ᠰᠦᠮ᠎ᠡ  ᠳᠤ ᠰᠠᠭᠤᠭ᠎ᠠ ᠺᠦᠰᠦᠯ ᠮ᠊᠂ ᠺᠦᠽᠡᠮᠢᠨᠰᠺᠡᠢ ᠨᠠᠷ 1912 ᠣᠨ ᠤ 9 ᠰᠠᠷ᠎ᠠ ᠶᠢᠨ 2 ᠡᠲᠦᠷ ᠬᠤᠪᠲᠤ ᠬᠤᠲᠠᠨ᠎ᠠ ᠫᠷᠤᠲ᠋ᠤᠺᠠᠯ ︵ᠭᠡᠷ᠎ᠡ ︶ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃《 ᠁ ᠲᠠᠮᠳᠢᠨᠰᠦ᠋ᠷᠦᠩ ᠪᠤᠯᠪᠠᠰᠤ ᠲᠦᠮᠡᠨ ᠭᠠᠵᠠᠷ ᠤᠨ ᠴᠢᠨᠠᠲᠤ ᠡᠲᠡᠭᠡᠳ ᠠᠴᠠ ᠦᠨᠡᠨᠬᠦ ᠪᠢᠰᠢᠷᠡᠩᠬᠦᠢ ᠪᠠᠷ ᠲᠠᠭᠠᠵᠤ ᠤᠷᠤᠵᠤ ᠪᠤᠬᠲᠠ ᠡᠵᠡᠨ ᠤ ᠲᠦᠰᠢᠮᠡᠯ ᠬᠡᠰᠢᠭ ᠢ ᠬᠦᠷᠲᠡᠵᠦ᠂ ᠲᠠᠷᠠᠭ᠎ᠠ ᠪᠠᠷ ᠡᠶᠢᠨᠬᠦ ᠬᠤᠯᠴᠢᠯᠠᠨ ᠵᠢᠳᠬᠦᠨ ᠶᠠᠪᠤᠵᠤ ᠲᠡᠷᠰᠯᠡᠭᠰᠡᠨ ᠲᠠᠶᠢᠰᠤᠨ ᠢ ᠰᠢᠨᠦᠭᠡᠵᠦ ᠲᠤᠯᠭᠠᠭᠤᠷᠢ ᠪᠠᠶᠢᠭᠤᠯᠤᠭᠰᠠᠨ ᠤᠯᠤᠰ ᠲᠦᠷᠦ ᠶᠢᠨ ᠰᠠᠭᠤᠷᠢ ᠶᠢ ᠪᠠᠶᠢᠭᠤᠯᠤᠭᠰᠠᠨ ᠨᠢ ᠤᠨᠴᠠ ᠰᠠᠶᠢᠰᠢᠶᠠᠯᠲᠡᠢ ᠁》 ᠬᠡᠮᠡᠨ ᠭᠠᠪᠢᠶ᠎ᠠ ᠲᠡᠮᠲᠡᠭᠯᠡᠵᠦ᠂ ᠮᠤᠩᠭᠤᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠠᠴᠠ ᠦᠶ᠎ᠡ ᠤᠯᠠᠷᠢᠨ ᠵᠠᠯᠭᠠᠮᠵᠢᠯᠠᠬᠤ ᠵᠠᠰᠠᠭ᠂ ᠲᠦᠷᠦ ᠶᠢᠨ ᠪᠠᠶᠢᠯᠠ᠂ ᠬᠤᠶᠠᠷ ᠨᠢᠲᠦᠨ ᠤ ᠲᠤᠭᠤᠰ ᠤᠨ ᠤᠲᠤᠭ᠎ᠠ᠂ ᠴᠡᠷᠢᠭ ᠤᠨ ᠵᠠᠩᠵᠤᠨ᠂《 ᠮᠠᠩᠯᠠᠢ ᠪᠠᠭᠠᠲᠤᠷ 》ᠴᠤᠯᠠ ᠱᠠᠩᠨᠠᠨ ᠬᠦᠷᠲᠡᠭᠡᠵᠡᠢ᠃                  ᠲᠠᠮᠳᠢᠨᠰᠦ᠋ᠷᠦᠩ ᠨᠠᠷ ᠬᠤᠪᠲᠤ ᠬᠤᠲᠠ ᠶᠢ ᠬᠡᠷᠬᠢᠨ ᠴᠢᠯᠦᠭᠡᠯᠡᠭᠰᠡᠨ ᠢᠶᠠᠨ ᠮᠤᠩᠭᠤᠯ ᠤᠯᠤᠰ ᠤᠨ ᠵᠠᠰᠠᠭ ᠤᠨ ᠭᠠᠵᠠᠷ ᠲᠤ ᠢᠯᠡᠭᠡᠰᠡᠨ ᠠᠶᠢᠯᠠᠳᠬᠠᠯ ᠳᠠᠭᠠᠨ᠄《 ᠁ ᠬᠤᠪᠲᠤ ᠬᠤᠲᠠ ᠶᠢᠨ ᠮᠠᠨᠵᠤ ᠰᠠᠶᠢᠳ᠂ ᠬᠢᠲᠡᠳ ᠲᠦᠰᠢᠮᠡᠳ ᠵᠢᠴᠢ ᠤᠯᠠᠨ ᠬᠤᠲᠠᠯᠲᠤᠭᠠᠨ ᠤ ᠢᠷᠭᠡᠴᠤᠳ ᠲᠤ ᠡᠷᠬᠡ ᠦᠭᠡᠢ ᠨᠠᠶᠢᠷ ᠲᠠᠢ ᠶᠤᠰᠤᠭᠠᠷ ᠬᠡᠯᠡᠯᠴᠡᠵᠦ ᠰᠡᠢᠳᠬᠡ ᠭᠡᠮᠡᠨ ᠬᠡᠲᠦ ᠬᠡᠲᠦᠨ ᠤᠲᠠᠭ᠎ᠠ ᠬᠤᠭᠤᠴᠠᠭ᠎ᠠ ᠬᠤᠭᠤᠴᠠᠵᠤ ᠤᠬᠠᠭᠤᠯᠬᠤ ᠪᠢᠴᠢᠭ ᠢᠯᠡᠭᠡᠭᠰᠡᠨ ᠳᠤ ᠮᠠᠨᠵᠤ᠂ ᠬᠢᠲᠡᠳ ᠨᠠᠷ ᠨᠢᠭᠡᠨᠲᠡ ᠬᠡᠷᠡᠭᠰᠡᠬᠦ ᠦᠭᠡᠢ᠂ ᠬᠠᠷᠢᠨ ᠬᠤᠷᠰᠢᠨ ᠨᠡᠶᠢᠯᠡᠵᠦ᠂ ᠤᠯᠠᠮ ᠢᠶᠠᠷ ᠬᠤᠷᠤᠰᠤᠯ ᠠᠭᠤᠯᠵᠤ ᠬᠤᠲᠠ ᠶᠢᠨ ᠵᠠᠬ᠎ᠠ ᠶᠢᠨ ᠭᠠᠵᠠᠷ ᠢ ᠲᠤᠭᠤᠷᠢᠨ ᠮᠠᠯᠲᠠᠭᠤᠯᠵᠤ᠂ ᠨᠢᠭᠤᠬᠲᠠᠵᠤ ᠫᠤᠤᠲᠠᠬᠤ ᠤᠷᠤᠨ ᠵᠠᠰᠠᠵᠤ᠂ ᠪᠠᠰᠠ ᠴᠦ ᠮᠤᠩᠭᠤᠯᠴᠤᠳ ᠢ ᠬᠤᠲᠠ ᠶᠢᠨ ᠤᠶᠢᠷ᠎ᠠ ᠦᠵᠡᠭᠲᠡᠬᠦ ᠪᠦᠷᠢ ᠫᠤᠤ ᠲᠠᠯᠪᠢᠵᠤ᠂ ᠡᠰᠡᠷᠭᠦᠴᠡᠯᠲᠦᠨ ᠪᠠᠶᠢᠯᠲᠤᠭᠰᠠᠭᠠᠷ ᠪᠤᠯᠪᠠᠴᠦ ᠭᠠᠭᠴᠠᠬᠦ ᠪᠢᠲᠡᠨᠡᠷ ᠵᠦᠢ ᠶᠢ ᠡᠷᠢᠵᠦ ᠠᠷᠭᠠᠴᠠᠭᠠᠨ ᠰᠡᠢᠳᠭᠡᠬᠦ ᠶᠢ ᠬᠢᠴᠢᠶᠡᠵᠦ ᠤᠷᠤᠰ ᠤᠯᠤᠰ ᠤᠨ ᠺᠦᠨᠰᠦᠯ ᠰᠠᠶᠢᠳ ᠳᠤ ᠬᠡᠯᠡᠵᠦ ᠨᠠᠶᠢᠷᠠᠯᠲᠤᠨ ᠲᠤᠬᠤᠨᠢᠭᠤᠯᠬᠤ ᠶᠢ ᠮᠠᠨᠵᠤ᠂ ᠬᠢᠲᠡᠳ ᠨᠠᠷ ᠲᠤ ᠤᠬᠠᠭᠤᠯᠤᠨ ᠬᠡᠯᠡᠬᠦ ᠠᠵᠢᠶᠠᠮᠤ ᠬᠡᠮᠡᠨ ᠬᠡᠯᠡᠭᠰᠡᠨ ᠳᠤ ᠺᠦᠨᠰᠦᠯ ᠰᠠᠶᠢᠳ ᠲᠠᠷᠤᠢ ᠵᠦᠪᠰᠢᠶᠡᠷᠡᠵᠦ ᠬᠤᠶᠠᠷ ᠤᠯᠤᠰ ᠤᠨ ᠬᠡᠷᠡᠭ ᠢ ᠨᠠᠶᠢᠷ ᠲᠠᠢ ᠪᠤᠯᠭᠠᠨ ᠬᠡᠯᠡᠯᠴᠡᠶ᠎ᠡ ᠭᠡᠬᠦ ᠤᠴᠢᠷ ᠢ ᠤᠷᠢᠲᠠᠪᠠᠷ ᠪᠢᠴᠢᠭ ᠶᠠᠪᠤᠭᠤᠯᠤᠭᠠᠳ ᠲᠠᠭᠠᠯᠲᠤᠪᠡᠷ ᠺᠦᠨᠰᠦᠯ ᠰᠠᠶᠢᠳ ᠪᠡᠶ᠎ᠡ ᠪᠠᠷ ᠬᠠᠷᠢᠶᠠᠲᠤ ᠤᠷᠤᠰ ᠴᠡᠷᠢᠭ ᠤᠳ ᠢ ᠲᠠᠭᠠᠭᠤᠯᠵᠤ᠂ ᠮᠠᠨᠵᠤ ᠰᠠᠶᠢᠳ ᠬᠢᠲᠡᠳ ᠲᠦᠰᠢᠮᠡᠳ ᠲᠤ ᠨᠢᠭᠤᠷ ᠲᠤᠯᠵᠤ ᠠᠭᠤᠯᠵᠠᠬᠤ ᠪᠠᠷ ᠤᠴᠢᠲᠠᠯ᠎ᠠ ᠮᠠᠨᠵᠤ ᠬᠢᠲᠡᠳ ᠨᠠᠷ ᠺᠦᠨᠰᠦᠯ ᠰᠠᠶᠢᠳ ᠤᠨ ᠡᠮᠤᠨ᠎ᠡ ᠠᠴᠠ ᠫᠤᠤ ᠲᠠᠯᠪᠢᠵᠤ ᠬᠦᠭᠡᠭᠡᠨ ᠵᠠᠶᠢᠯᠠᠭᠤᠯᠤᠭᠰᠠᠨ ᠪᠦᠭᠡᠳ ᠨᠠᠶᠢᠷᠠᠯᠲᠤᠨ ᠲᠤᠬᠤᠨᠢᠭᠤᠯᠵᠤ ᠴᠢᠲᠠᠬᠤ ᠦᠭᠡᠢ ᠳᠤ ᠬᠦᠷᠦᠭᠰᠡᠨ ᠵᠠᠨᠤᠯ ᠲᠠᠢ ᠪᠠᠶᠢᠲᠠᠯ ᠢᠯᠡᠷᠬᠡᠢ ᠮᠡᠲᠡᠭᠲᠡᠭᠰᠡᠨ ᠲᠤᠯᠠ ᠪᠢᠲᠡ ᠨᠠᠷ ᠪᠦᠭᠦᠲᠡᠭᠡᠷ ᠵᠦᠪᠯᠡᠯᠲᠦᠵᠦ ᠰᠢᠭᠤᠳ ᠲᠠᠶᠢᠯᠠᠷ᠎ᠠ ᠤᠷᠤᠬᠤ ᠶᠢ ᠲᠤᠭᠲᠠᠵᠠᠢ ᠁ 》 ᠭᠡᠮᠡᠨ ᠪᠠᠶᠢᠯᠲᠤᠨ ᠴᠢᠯᠦᠭᠡᠯᠡᠭᠰᠡᠨ ᠢᠶᠠᠨ ᠢᠯᠡᠳᠬᠡᠵᠦ᠂ ᠮᠤᠩᠭᠤᠯ ᠤᠨ 18 ᠴᠡᠷᠢᠭ ᠠᠯᠠᠭᠲᠠᠭᠰᠠᠨ ᠢ ᠲᠤᠷᠠᠲᠤᠭᠰᠠᠨ ᠠᠵᠢ᠃ ᠮᠤᠩᠭᠤᠯ ᠴᠡᠷᠢᠭ ᠤᠳ ᠬᠤᠪᠲᠤ ᠶᠢᠨ ᠱᠤᠷᠤᠩ ᠳᠤ ᠤᠯᠠᠨ ᠵᠢᠯ ᠬᠤᠷᠢᠬᠲᠠᠵᠤ ᠲᠠᠷᠴᠢᠯᠠᠵᠤ ᠪᠠᠶᠢᠭᠰᠠᠨ ᠬᠠᠯᠬ᠎ᠠ ᠲᠦᠷᠪᠡᠳ ᠤᠯᠠᠨ ᠶᠠᠰᠤᠲᠠᠨ ᠤ 400 ᠭᠠᠷᠤᠢ ᠬᠦᠮᠦᠰ ᠢ ᠰᠤᠯᠯᠠᠭᠰᠠᠨ ᠨᠢ ᠮᠤᠩᠭᠤᠯ ᠤᠯᠤᠰ ᠤᠨ ᠴᠢᠯᠦᠭᠡᠯᠡᠬᠦ ᠴᠡᠷᠢᠭ ᠤᠨ ᠨᠡᠷ᠎ᠡ ᠬᠦᠨᠲᠦ ᠶᠢ ᠲᠤᠰ ᠬᠢᠵᠠᠭᠠᠷ ᠨᠤᠲᠤᠭ ᠲᠤ ᠶᠡᠬᠡᠲᠡ ᠮᠠᠨᠲᠤᠭᠤᠯᠪᠠ᠃ ᠬᠤᠪᠲᠤ  ᠶᠢ ᠴᠢᠯᠦᠭᠡᠯᠡᠭᠰᠡᠨ ᠢᠶᠠᠷ ᠲᠤᠰ ᠬᠢᠵᠠᠭᠠᠷ ᠨᠤᠲᠤᠭ ᠤᠨ ᠤᠯᠠᠨ ᠶᠠᠰᠤᠲᠠᠨ ᠮᠤᠩᠭᠤᠯ ᠤᠯᠤᠰ ᠢ ᠲᠠᠭᠠᠵᠤ ᠠᠷᠤ ᠮᠤᠩᠭᠤᠯ ᠤᠨ ᠪᠦᠬᠦ ᠨᠤᠲᠤᠭ ᠬᠠᠷᠢ ᠮᠠᠨᠵᠤ ᠶᠢᠨ ᠨᠤᠶᠠᠷᠬᠠᠯ ᠠᠴᠠ ᠠᠩᠬᠢᠵᠠᠷᠠᠵᠤ ᠮᠤᠩᠭᠤᠯ ᠤᠯᠤᠰ ᠤᠨ ᠪᠦᠷᠢᠨ ᠬᠢᠨᠠᠯᠲᠠ ᠳᠤ ᠤᠷᠤᠭᠰᠠᠨ ᠨᠢ ᠮᠤᠩᠭᠤᠯᠴᠤᠳ ᠤᠨ ᠦᠨᠲᠦᠰᠦᠲᠡᠨ ᠤ ᠡᠷᠬᠡ ᠴᠢᠯᠦᠭᠡᠨ ᠤ ᠬᠤᠪᠢᠰᠬᠠᠯᠲᠤ ᠲᠡᠮᠡᠴᠡᠯ ᠤᠨ ᠡᠬᠢᠨ ᠤ ᠱᠠᠲᠤᠨ ᠤ ᠠᠮᠵᠢᠯᠲᠠ ᠮᠥᠨ᠃                                  
 
  ᠮ᠊ ᠊ ᠡᠩᠬᠡᠵᠢᠷᠭᠠᠯ ᠤᠨ ᠪᠦᠷᠭᠡ
 
 
  
  
    
 

   
  
2014-2015 ©                      蒙ICP备05070829号